Ta instalando bakinan nobo cu dobel capacidad rond di nos centro di ciudad

Como parti di esfuersonan di revitalisacion di Oranjestad, ta haciendo un serie di trabounan di mantencion y mehoracion den nos centro di ciudad. Awo a toca turno pa expande e capacidad di coleccion di desperdicio, pa asina yuda mantene nos centro di ciudad limpi, contribuyendo na eleva e higiena y estetica. Tur e esfuersonan aki na final ta pa sostene e factibilidad comercial di e area.

Mester nota cu limpiesa ta keda un factor cu mester keda atende cu’ne constantemente. Recientemente, den luna di juni, trabou di mantenecion y limpiesa general a wordo realisa na Caya G.F. Betico Croes, caminda e.o a trim matanan cu tabata “long overdue”. Un di e kehonan tambe tabata cu barinan di sushi tabata yena lihe y tin biaha bai over, cual ta un mahos bista pa tur cu ta bishita y frecuenta e area.

E barinan di sushi ta traha completamente di plastico recicla, y ta un colaboracion cu Plastic Beach Party, un instancia non-profit cu ta recicla plastico na Aruba. Cu instalacion di e barinan nobo, e meta ta pa no solamente aumenta e capacidad di carga, pero tambe pa introduci e concepto di separacion di desecho, ofreciendo un vak separa pa sushi di plastico. Esaki ta un inversion di mas di 70 mil florin di parti Ministerio di Asunto Economico, Comunicacion y Desaroyo Sostenibel.

‘Den futuro lo tin mas opcionan di separacion, pero esaki ta un bon comienso’, segun minister Geoffrey Wever. ‘Nos a compromete pa haci Oranjestad un lugar mas limpi, accesibel, y vibrante pa tanto residente como bishitante. E instalacion di e barinan nobo ta parti di un iniciativa mas amplio pa mehora e experiencia general den nos ciudad. Mantene limpiesa ta crucial pa e bienestar di nos comunidad’, segun e mandatario.

Nos ta aprecia e apoyo y cooperacion di nos comunidad mientras nos ta sigui paso-pa-paso cu e trabounan di mantencion y mehoracion importante aki.