Stichting Pro Lagun ta eksigí seramentu di lèntfel di forma imediato 

KRALENDIJK – Stichting Pro Lagun a presentá un petishon di mantenshon na Direkteroado di Supervishon i Mantenshon di Entidat Públiko Boneiru. E fundashon ta eksigí, pa medio di un karta di abogado Barbara Nagelmakers dia 20 di febrüari, ku e lèntfel di Lagun mester sera mesor, i ku gobiernu tuma medida pa prevení mas riesgo pa medio ambiente i salú.

Segun e fundashon, Selibon ta funshonando sin e pèrmitnan nesesario i ta violando vários lei ambiental. 

E karta ta enfatisá e efektonan negativo di lèntfel, inkluyendo emishon tóksiko, kontaminashon di tera i laman i kandela kontinuo bou tera ku ta pone salú di e poblashon den peliger. E fundashon ta referí na rapòrt di Inspekshon di Ambiente i Transporte (ILT) i RIVM, unda ta alertá pa e impakto dañino di e kimamentu di sushi. Ademas, e fundashon ta pone ku gobièrnu lokal ta na altura di e problemanan ya pa años, pero te ainda no a hasi nada efektivo pa intervení.

Obligashon pa kumpli

Segun Stichting Pro Lagun, tin un obligashon legal di kumplimentu i gobièrnu no solamente mester  mester yega na seramentu imediato di lèntfel, pero ademas mester sòru pa limpiamentu di tereno kontaminá i pa laga hasi investigashon independiente riba e riesgo di salú pa e hendenan ku ta biba den serkania. E fundashon ta klarifiká ku nan no sigui akseptá promesa bashí mas, pero ta eksigí akshon konkreto pa solushoná e situashon na Lagun di manera struktural.

Ounke ku e karta di SPL ta dirigí na Entidat Públiko, mester remarká ku ta referí na e temporada ku Helmond tabata enkargá ku e situashon na Selibon. Un dia despues, riba dia 21 di febrüari, Korte den Promé Instansha na Boneiru a husga ku mester a drei bèk in intervenshon hasí pa Helmond i kaminda e responsabilidat a bai bèk pa gobièrnu di Boneiru. 

0