3
Aruba a uni su mes na e conmemoracion cu 35 aña pasa riba 20 november, lidernan mundial a yega na un acuerdo den un asamblea general di Nacionnan Uni pa proteha e bienestar di tur mucha pa medio di e Tratado di Derecho di Mucha. Mientrastanto e cantidad di país cu a ratifica e tratado a yega un total di 196 pais cu a transforma e bida di muchanan rond di mundo.
Na aña 2001 Aruba tambe a ratifica e Tratado aki, haciendo asina e compromiso pa proteha e mucha. E mesun aña, gobierno di Aruba a instala e Comision Nacional Derecho di Mucha pa percura cu e cumplimento di e Tratado ta sosode na un forma coordina y eficiente. E Comision Derecho di Mucha ta consisti di 8 organisacion gubernamental y 2 organisacion no-gubernamental.
E simposio ta un iniciativa di Comision Derecho di Mucha pa asina hunto nos refleha riba articulo 12 en particular:
E derecho pa expresa e opinion libremente den tur asunto cu ta concerni e mucha, na unda ta duna valor adecua na e opinion di e mucha di acuerdo na su edad y madures. Pa e meta aki e mucha ta haya specialmente oportunidad di ser scucha den cada procedura hudicial y gubernamental cu ta concerni e mucha, sea directamente of pa medio di un representante of un institucion adecua pa esey, na un manera cu ta compatibel cu e reglanan di procedimento di e derecho nacional.
Durante e simposio articulo 12 a wordu treci den diferente forma. Juez Jojanneke Brandt a elabora riba e proceduranan legal conforme lei pa scucha e mucha. Psicólogo Antoniette Geerman a duna un presentacion pa loke ta e desaroyo di e mucha. Jorlanny Kelly, Aruba su Minister Hubenil di derecho di mucha a elabora riba e tratado. Nurianne Arias-Helder, docente na Universidad di Aruba a modera un panel consistiendo di 6 hoben di diferente organización cu tin articulo 12 den nan organización ancra. Aruba Heart Centered Leadership Foundation a presenta un sesión interactivo y e hoben Philip Johnson Martinez a declama un poema. Hunto cu invitadonan presente a conmemora 35 aña di e tratado teniendo na cuenta cu menornan di edad tin e derecho pa expresa nan opinion y wordo scucha.
