Diabierna 21 di februari, durante e Conferencia di Prensa di Gobierno di Aruba, Prome Minister Evelyn Wever-Croes a informa riba dos decision importante cu a wordo tuma durante Conseho di Minister di Reino. Ta trata di e revocacion di ley di RAft y e deadline cu Rijksministerrraad a pone pa Aruba trata Presupuesto 2025.
Presupuesto 2025 ta na Parlamento
Ley di Aruba ta stipula cu 15 di December di e aña prome, e presupuesto di e aña siguiente mester ta estableci. Si esaki no ta e caso, por lo menos mester tin un indicacion riba un otro fecha. Den e caso di Presupuesto 2025, esaki ta na Parlamento caba, hunto cu tur documentacion necesario, incluyendo un nota di cambio, en espera pa Parlamento fiha un fecha pa e wordo trata.
CAft a manda carta pa Rijksministerraad
Manera ta conoci, CAft (College Aruba financieel toezicht) a manda un carta di aviso pa Parlamento y Gobierno pa pidi atencion pa trata Presupuesto 2025 mas pronto posibel. Como CAft no a haya contesta di parti di Parlamento, nan a escala esaki na Rijksministerraad (Conseho di Minister di Reino) y awe e carta di CAft tawata riba agenda pa wordo trata. Aki Rijksministerraad a duna instruccion na Aruba pa percura pa trata Presupuesto 2025 prome cu 31 di maart.
Gabinete Wever-Croes 2 a cumpli cu su responsabilidad
Minister Plenipotenciario señor Ady Thijsen na su turno a splica Rijksministerraad cu Gobierno di Aruba a haci tur di su parti y a entrega e presupuesto, a manda tur informacion na Parlamento y a contesta tur pregunta y lo sigui haci tur esfuerso pa e presupuesto wordo trata. Aki Rijksministerraad a indica cu nan lo manda un carta cu cual Gobierno di Aruba lo bolbe urgi Parlamento pa trata e presupuesto.
Presupuesto 2025 no ta stroba e Gobierno nobo
Prome Minister ta indica cu Presupuesto 2025, no ta un presupuesto cu lo stroba e Gobierno nobo. Pasobra den e maneho financiero a tene cuenta caba cu lo ta un aña pa un gobierno nobo bay fiha, debi na eleccion na december. E presupuesto tin lo basico cu e gobierno mester pa sigui funciona y sigui duna e servicio basico y si e presupuesto no pasa, ta pone full e operacion di Gobierno den peliger. Pa awor lo por uza solamente un parti di e presupuesto, pero e ta limita na 1/4 di e presupuesto di 2024. Unabes cu bin un gobierno nobo na maart, nan por cuminsa traha riba nan “Nota di Cambio” y bin cu e presupuesto supletorio. Haciendo esey lo no tin problema cu Hulanda, cu Rijksministerraad, ni un escalacion cu por yega hasta atrobe na un KB, un Curatela Financiero. Den e caso aki, lo no ta un KB pa Gobierno di Gabinete Wever-Croes 2, cu a cumpli cu entrega e presupuesto, sino pa e gobierno nobo.
Prome Minister:
“Di akinan un apelacion na e partidonan den formacion, partido AVP y FUTURO, pa atende cu e stuacion aki na un manera serio y debido pa Aruba no hay’e un biaha mas den e problema di escalacion cu Rijksministerraad. Algo cu mi a siña den 7 aña den relacion den Reino ta cu confiansa ta e cos di mas importante. Haci loke bo ta bisa y bisa loke bo ta haci. Si bo drenta gobierno den un situacion di desconfiansa pasobra bo tawata terco y no kier a pasa e presupuesto, bo ta cuminsa den desbentaha y lo tarda bo tempo pa haya e bentaha. Ami a pasa aden na 2017, ora mi a drenta Gobierno cu un desbentaha grandi y apesar cu tawata un otro gobierno, otro asignatura, otro persona y hasta otro genero, pa Hulanda e tawata e Gobierno di Aruba, e Gobierno di Mike Eman cu a redobla e debe y bay den welga di hamber. Esey Hulanda tawata tira na mi cara constantemente.
Awor Gabinete Wever-Croes a crea un base di confiansa y por a wak esaki den un carta cu Secretario di Estado a manda pa Parlamento Hulandes den cua e ta indica di tin tur confiansa cu Aruba lo logra su metanan financiero. E Gobierno nobo lo cuminsa cu un base di confiansa cu ami a traha pa nan, cu ami no tawatin ora mi a cuminsa, no bent’e afo zomaar, paso ta e pueblo di Aruba lo bay paga pa esaki despues”.
CAft Manda Carta na Conseho di Minister di Reino Tocante Presupuesto 2025
CONSEHO DI MINISTER DI REINO TA PONE DEADLINE PA TRATA PRESUPUESTO 2025
ORANJESTAD – Diabierna 21 di februari, durante e conferencia di prensa di Gobierno di Aruba, Prome Minister Evelyn Wever-Croes a informa tocante dos decision importante tuma den Conseho di Minister di Reino. Ta trata di e revocacion di ley di RAft y e deadline cu a wordo pone pa Aruba trata Presupuesto 2025.
Presupuesto 2025 Ta Den Parlamento
Segun ley, 15 di december di e aña anterior mester tin un presupuesto aproba pa e aña siguiente. Si esaki no ta e caso, mester tin un otra fecha indica. E Presupuesto 2025 ta caba den Parlamento cu tur documentacion necesario, incluyendo un nota di cambio, y ta keda espera pa Parlamento fija un fecha pa e wordo trata.
CAft A Escala E Situacion Na Conseho di Reino
CAft (College Aruba financieel toezicht) tabata manda un carta di aviso na Parlamento y Gobierno pa pidi cu e presupuesto wordo trata lihe. Pasobra Parlamento no a duna un contesta, CAft a escala e tema na Conseho di Minister di Reino. Durante e reunion, a tuma decision pa instrui Aruba pa trata Presupuesto 2025 prome cu 31 di maart.
Gobierno A Cumpli Cu Su Responsabilidad
Minister Plenipotenciario Ady Thijsen a splica na Conseho di Minister cu Gobierno di Aruba a entrega e presupuesto, a duna Parlamento tur documentacion necesario y a contesta tur pregunta. Como resultado, Conseho di Minister di Reino a dicidi manda un carta na Parlamento urgi nan pa trata e presupuesto.
Presupuesto 2025 No Ta Stroba E Gobierno Nobo
Prome Minister a aclara cu e presupuesto no ta un obstaculo pa e gobierno nobo. Den e plan financiero ya a tene cuenta cu ta un aña di transicion despues di eleccion na december. E presupuesto ta contene lo basico pa Gobierno sigui opera y duna servicio esencial. Pero sin aprobacion, por usa solamente 1/4 di e presupuesto di 2024, cu por pone operacion gubernamental den peliger. Ora e gobierno nobo tuma funcion na maart, nan por traha riba nan “Nota di Cambio” y presenta un presupuesto supletorio, evitando problema cu Hulanda of un escalacion financiero.
Apelacion Na Partidonan Politico
Prome Minister ta pidi cu e partido AVP y FUTURO, cu ta den formacion di gobierno, tuma e situacion aki serio pa evita mas problema cu Conseho di Minister di Reino. Segun su experiencia, confiansa ta e clave den relacion den Reino.
E a recorda cu den 2017 su gobierno a enfrenta hopi obstaculo financiero debido na mala maneho anterior. Pero, cu trahamento responsable, Aruba a reconstrui su confiansa, algo reconoci den un carta reciente di Secretario di Estado Hulandes.
Su mensaje ta claro: Goberna cu responsabilidad, evita conflicto innecesario y conserva e progreso logra, pasobra na fin di cuenta, ta e pueblo di Aruba cu lo paga e consecuencia.
