Promé matrimonio bou di awa na Boneiru

KRALENDIJK – Djabièrnè 28 di mart tabatin un momento úniko na Boneiru: e promé matrimonio ofisial bou di awa a tuma lugá. Na e sitio di buseo Angel City e Kanades Holly Brie Henderson i Derek Patrick Messner-Henning a bisa si na otro, un primisia pa e isla.

Dos aña pasá nan a bishitá Boneiru pa promé biaha i a namorá mésora di e mundu kolorido bou di awa i  e trankilidat di naturalesa. Nan tabata sigur: si un dia nan disidí di kasa esei lo ta bou di awa.

Un seremonia úniko

Dennis Martinus, ofisiante i sambuyadó sertifiká, a guia e seremonia. Danki na su kombinashon eksepshonal di ekspertisio i pashon e matrimonio no tabata solamente eksepshonal, pero tambe ofisialmente legal. Bou di awa Holly i Derek a skirbi “I DO” riba bòrchinan resistente na awa. Despues nan a bini ariba pa firma e akta di matrimonio riba bich huntu ku seis testigu.

Seis sambuyadó boluntario a asistí e pareha matrimonial pa hasi e seremonia eksepshonal aki posibel: Thursten Winklaar, David Martinus, Robin Redelijkheid, Ismar Enriquez Iglesias, Aaron Skeates i Chantelle Skeates.

Dennis Martinus ta hasi kada seremonia matrimonial algu spesial. “Esaki no tabata un matrimonio sin mas, e tabata un homenage na amor, libertat i e magia di laman,” e ta konta. “Mi a ofisiá matrimonionan na diferente sitio: riba un planki di windsurf, un boto, Seru Largu, Klein Bonaire i asta na Hulanda i Medellin.” E aña aki e ta selebrá su du djes aniversario komo ofisiante i e matrimonio aki bou di awa ta hasi esei èkstra spesial.

Un paraiso pa sambuyadó- i enamoradonan

E seremonia a bira posibel danki na e guia profeshonal di 4 Wheel Dive, i danki na fotógrafo di bou di awa Casper Douma ku a kompartí algun imágen bunita.

Boneiru ta demostrá di nobo dikon e ta un paraiso pa sambuyadó í awor tambe un destinashon úniko pa enamoradónan ku ta buska profundidat literalmente.

16