3
Diahuebs anochi den Santa Theresita Center na San Nicolas, N.V Elmar a tene un Town Hall Meeting. E meta di e Town Hall Meeting tabata pa informa e comunidad di San Nicolas, tocante e renobacion di e branch na San Nicolas y tambe kiko tur San Nicolas por spera despues di e renobacion.
Durante e Meeting a splica cu lo cera nan branch e di 3 siman di februari. Segun e director di N.V. Elmar, Sr. Irausquin, e contratista lo cuminsa e prome siman di maart, pero prome cu e construccion cuminsa, N.V ELMAR mester desmantela cabelnan y tambe saca cosnan importante for di e edificio, pa e motibo ey nan ta cera e branch un pa dos siman prome.
Un Town Hall Meeting exitoso, esnan presente a haci hopi pregunta, no solamente relaciona cu e renobacion, pero tambe tocante varios otro topiconan, nan tabata tin diferente remarcanan of consehonan riba diferente otro topiconan tambe, por ehempel tocante luznan di caya, di cual Elmar a duna un splicacion amplio, con pa haci e peticion aki. Un otro topico tabata tocante pagonan cu via banco sa bay robes.
Segun e director, e ta contento cu e interes grandi demostra na e Town Hall Meeting . Elmar t’ey pa scucha Pueblo. E meta principal di e Town Hall Meeting aki tabata pa Elmar comunica y duna informacion di kiko tur nan ta bay haci pa San Nicolas y pa asina e comunidad di San Nicolas por ta na altura di esakinan.
Un gran parti di esnan presente no ta den e mundo di digitalisacion ainda, ta e grupo cu tur luna ta acudi personalmente na Elmar pa paga nan cuenta di coriente y nan a mustra di ta hopi interesa den e cambionan cu Elmar tin pa San Nicolas. Segun Yrausquin, despues cu e branch na San Nicolas habri bek, lo por spera miho servicio. E edificio lo ta bay ta mas espacioso y lo tin mas facilidadnan compara cu prome.
Tambe despues di e renobacion, San Nicolas lo haya bek e servicio tecnico cu desde pandemia a wordo cera, pero awor cu e ]compra di e propiedad patras di e edificio di Elmar. E parti tecnico na San Nicolas lo haya truck y stock, pa asina por haci e trabounan tecnico mas liher den area di San Nicolas. Por ultimo e director a splica cu lo por spera mas EV stations, no solamente na San Nicolas, pero tambe na diferente parti di nos isla.
