09-06-2025 -
3 minuten leestijd
KRALENDIJK – E flamante Miss Universo 2024, Victoria Kjær Theilvig di Dinamarka a yega Boneiru djadumingu despues di un estadia kòrtiku na Kòrsou. Su bishita na nos isla ta forma parti di un gira den área di Karibe, kaminda ta pone e islanan mas chikitu tambe den publisidat.
Na su yegada gezaghebber John Soliano, ku no a skonde su entusiasmo, a yama Theilvig bonbiní: “Nos ta spera ku bo no ta bishitá Boneiru solamente komo Miss Universo, pero ku bo lo bolbe tambe den futuro komo turista.”
Theilvig tabata entusiasmá ku e isla i a kontestá ku un sonrisa: “Mi ta anhelá di bèrdat pa eksplorá e isla. Mi ta di bèrdat un isleña i ta hopi agradesido di ta akinan. Mi a tende bunita kos di Boneiru i naturalmente mi a buska online tambe – i e ta mustra fantástiko.”
Kurioso pa konosé Boneiru
Den un kòmbersashon kòrtiku Theilvig a puntra kurioso kon grandi Boneiru ta. Gezaghebber Soliano a splika ku e isla ta chikitu na tamaño, pero riku na naturalesa, kultura i hospitalidat.
E próksimo sinku dianan aki Theilvig lo bishitá diferente lugá riba e isla. Mañan tin un bishita planiá ofisialmente riba e programa pa bishitá gobièrnu insular. Tambe tin espasio pa rekreá i pasa prèt. E lo eksplorá por ehèmpel huntu ku Miss Boneiru 2023, Ruby Pouchet, un parti di e isla. Pouchet a partisipá tambe e aña aki na elekshon di Miss-Universo, pero lástimamente no a kai den e premionan.
Inspirá
Theilvig ta enfatisá e importansia di su bishita na paisnan mas chikitu: “Mi mes ta bini di Dinamarka, ku tampoko no ta un pais grandi. Ta importante pa paisnan chikitu tambe tin representashon. Esei ta inspirá hóbennan pa keda soña, pasobra si bo ta bini di un pais chikitu tambe tur kos ta posibel.”
Finalmente Theilvig a laga sa di ta spera spesialmente di purba kushina lokal, deskubrí naturalesa, i podisé asta snòrkel òf sambuyá: “Mi ke gosa huntu ku e hendenan di aki, siña konosé e kultura, purba e kuminda, wak e playanan …… i podisé asta drenta laman.”
5
Follow the story