Minister Geoffrey Wever ta reuni cu gremionan comercial tocante Tariffs

6

Den siman cu a pasa Minister Geoffrey Wever a tene un reunion di importancia cu ATA, AHATA, ATIA, AFBA y KVK. E preocupacion principal cu ta reina na e momento aki ta e posibel consecuencianan pa Aruba door di e tariffnan imponi na Merca, for di cual nos ta importa mas di 50% di tur nos productonan.

“Aunke na e momento aki no tin causa pa panico, si a corto plaso nos mester prepara pa cualquier situacion negativo cu e decisionnan na merca por tin pa economia di Aruba.” 

Minister Wever a destaca cu ta sumamente importante pa percura cu tin espacio financiero pa absorba e posibel consecuencianan negativo cu decision politico na Merca por tin pa nos economia. Mester mantene un buffer financiero pa enfrenta cualkier situacion, pero sector priva tambe mester ta prepara. 

Tambe a ilustra e necesidad pa inverti mas fuerte cu nunca den nos propio alimentacion y den colaboracion comercial cu nos partnernan den region, manera e.o. Panama, Colombia, Surnam, pa importa productonan fresco y otro esencialnan. 

“Nos lo continua cu e maneho di diplomacia economico cu nos bisiñanan y haci tur lo necesario pa por facilita y simplifica transporte di carga pa Aruba for di region“, minister Wever a declara.

Minister Wever ta agradecido pa e dialogo y e input di e gremionan. E meta di e reunion aki tabata pa tende e pensamento di e gremionan comercial y inclui nan sugerencianan den e plan di gobierno pa mitiga un posibel impacto negativo. Minister Wever a indica di a pidi conseho for di Banco Central, Departamento di Asunto Economico y Directie Financiën y cu esakinan a drenta. Na e momento aki tur conseho hunto cu input di sector priva ta wordo evalua y dentro di algun dia lo informa comunidad di e resultado.