Kralendijk Boneiro: Ku e anunsio aki Kuerpo Polisial Hulanda Karibense (KPCN) ke atvertí públiko tokante un estafa ku aktualmente ta tuma lugá via Facebook.
Tin un página di Facebook ku ta pretendé ku por gana un premio máksimo garantisá di kuater sifra den e loterianan ‘Wega di number Boneiru’ òf ‘Wega di number Kòrsou’. E estafadónan aki lo asta bai asina leu di manda bo un bon ganadó. Despues lo pidi bo pa paga un montante pa bo por risibí e premio, ku nan ta pretendé ku ta entre 75.000 i 90.000 florin. Despues di e promé pago, hopi bia ta sigui petishonnan nobo pa hasi pago, supuestamente pa kubri gastunan atministrativo òf belasting.
E kontakto kasi semper ta tuma lugá ku un persona ku ta papia spañó. Tambe ta manda karta ku logo di Maduro & Curiel’s Bank òf Ministerio di Finansa di Kòrsou, pa hasi e estafa mustra mas kreibel.
Tene na kuenta: niun hende por garantisá ku bo ta gana e premio mayó di loteria, sigur no via di Facebook.
KPCN ta hasi un yamada na un i tur pa ta alerta i no transferí sèn pa hendenan deskonosí ku ta hasi tipo di promesanan asina. E aña aki so, tabatin alrededor di dies notifikashon di víktimanan di e froude aki.
Bo tin algun duda òf a aserká bo di e forma deskribí ariba? Por fabor tuma kontakto mesora ku polis na 715-8000 òf mèldu esaki via www.politiecn.com.
Huntu nos ta tene Hulanda Karibense seif.
Source link
