Kapasidat limitá ta stroba investigashon di kandela na seru di sushi na Boneiru

KRALENDIJK – E insiguridat rondó di e kandela na e seru di sushi na Boneiru na luna di mei ta persistí. Ministerio Públiko (OM) a deklará ku e investigashon ta kanando ainda, pero eskases na kapasidat di rishèrshi ta opstakulisá esaki. Ta parse ku pa motibu di e diferente insidentenan ku arma di kandela ku e isla ta konfrontando e último lunanan, a para tanten e búskeda pa esnan kulpabel di e kandela na e seru di sushi.

E kandela riba e seru di sushi a kondusí na konsekuensianan drástiko pa e komunidat. Mester a evakuá vários habitante i hopi tabata enfrentá problema ku rosea pa motibu di e huma denso.  Ounke e outoridatnan a duna di konosé algun luna pasá ku tabata seif pa bai kas bèk, e habitantenan a keda ku duda. Insiguridat di kalidat di aire i falta di kontestanan kla di gobièrnu ta duna kuminda na e insiguridat.

A identifiká sospechosonan riba imáhennan di kámara 

Na luna di mei 2024 Selibon a laga sa ku for di  imáhennan di video a resultá ku dos persona pará na kantu tabata responsabel pa sende e kandela. E kompania a hasi denunsia e tempu ei, pero a enfatisá ku e sospechosonan no ta trahadó di Selibon. E bosero di Selibon a indiká ku ta OM so por duna mas detaye di un eventual detenshon.

OM ta hasi un yamada pa koperashon

Den un reakshon OM ta enfatisá ku e sospecho di kandela premeditá ta sentral ainda den e investigashon ku ta kanando. OM a rekonosé sinembargo ku otro kasonan urgente, entre kua resien insidentenan di violensia i tiroteo, a haña prioridat. Pa e motibu aki aktualmente tin insufisiente kapasidat pa sigui ku e investigashon di e kandela.

“Na momentu ku tin indikashonnan nobo disponibel, lo hasi un evaluashon di nobo atrobe relashoná ku e kapasidat di detekshon ku ta asigná na diferente investigashon,” segun e bosero di OM. Na mes momentu OM ta hasi un yamada na e pueblo pa kompartí eventual informashon di e kandela ku polis. Esaki por sosodé tambe anónimo via e liña anónimo di polis.

Inseguridat largu

Kasi ocho luna despues di e kandela no tin klaridat ainda di e personanan kulpabel òf e progreso di e investigashon. Pa e habitantenan di Boneiru e kandela ta keda un símbolo preukupante di e retonan ku e isla ta konfrontando, di e problemanan di medio ambiente te ku awor i tambe kapasidat limitá di detekshon.