Aruba Fair Trade Authority (AFTA) a ehecuta un investigacion profundo riba mercado di distribucion di cuminda y productonan esencial. Motibo pa esaki tabata un investigacion di AFTA na 2024, den cual a conclui cu acuerdonan entre distribuido of importado cu e distribuido di marca oficial den exterior posiblemente por tin influencia riba competencia y formacion di prijs. Esaki parcialmente lo por splica e motibo di prijsnan relativamente halto di cuminda y productonan esencial.
Un investigacion di mercado ta diferente di un investigacion di cumplimento cu ley, cu ta inicia ora ta trata di sospecho di un infraccion di e ley. Den caso di un investigacion di mercado e sospecho no t’ey, pero e resultadonan por ta motibo pa inicia un investigacion encuanto cumplimento di ley.
Pa e investigacion aki AFTA a uza diferente metodo di investigacion, esta analisis di documento y entrevista semi-structura. Banda di esey AFTA a manda, a base di articulo 5.1, inciso 3, bao a, di e Ordenanza encuanto Competencia (Mededingingsverordening), un peticion pa informacion na empresanan pa obtene documentonan y datonan relevante. Participantenan di mercado ta obliga di duna nan cooperacion, incluyendo duna contesta corecto y completo na preguntanan y peticion pa informacion. Un infraccion di e obligacion di cooperacion aki por keda sanciona pa AFTA cu un boet.
E investigacion tabata dirigi na e caracteristica y efecto di acuerdonan di distribucion exclusivo, cu atencion special pa nan impacto riba acceso na mercado, calculacion di prijs, importacion paralelo y competencia na Aruba. Durante e investigacion AFTA a topa cu e funcionamento di e Canasta Basico3. A pesar cu e Canasta Basico tabata fuera di e meta original di e investigacion, AFTA a dicidi di analisa esaki mas di cerca y a duna recomendacionnan.
Resultado principal
– Distribucion exclusivo ‘de facto’: Aunke e investigacion aki originalmente tabata dirigi na acuerdonan di distribucion exclusivo, ta resulta for di e investigacion cu acuerdonan exclusivo por escrito ta existi pero den cantidad limita. Den practica ta trata mas tanto di relacion di distribucion exclusivo, unda un distribuido4 riba base structural ta actua como e unico proveedo local di un marca o producto di marca na Aruba, sin cu esaki ta estableci por escrito. E pregunta ta si e distribuido local, huridicamente, por hasi un apelacion na e exclusividad aki cerca e distribuido oficial den exterior. Esey lo depende di circunstancia di e caso. Pero, di tur manera, e exclusividad de facto aki tin un efecto similar cu acuerdonan formal di distribucion exclusivo pa locual ta trata competencia y e acceso na e mercado.
1 Den cuadro di e investigacion aki ta comprende bao di producto di prome esential (bienes di consumo no duradero) producto cu ta ser uza rapidamente y cu regularmente mester cumpra atrobe. Ehempel ta alimento, producto di limpiesa y producto di higiena.
2 Articulo 6.1, inciso dos di Ordenanza encuanto Competencia.
3 Un lista di producto basico di cual e prijs ta regula pa gobernacion pa garantisa nan accesibilidad pa e consumido. 4 Un distribuido ta importa y suministra producto di propietario di marca na comercio di benta (detayista). Hopi biaha e distribuido den esey ta haya derecho exclusivo pa un cierto teritorio of clientela.
– Structura di mercado di Aruba: E banda di importacion ta wordo domina pa un cantidad limita di distribuido cu derecho di marca exclusivo de facto, loke ta conduci na un structura di mercado oligopolistico5 pa un gran cantidad di producto. Importado y distribuido cu ta desea di drenta e mercado local ta experiencia obstaculonan halto pa accessa e mercado pa motibo di relacionnan ya estableci di distribuidonan local cu nan distribuidonan oficial den exterior. Distribuidonan oficial den exterior no ta stimula pa nombra mas cu un distribuido local pa marca o producto di marca door di e tamaño di mercado na Aruba.
– Competencia: Tin competencia ‘inter-marca’ (entre marca), pero competencia ‘intra-marca’ (dentro di mesun marca) ta ausente pa gran parti pasobra distribuidonan oficial den exterior normalmente ta colabora exclusivamente cu un distribuido local sin cu tin un base di acuerdo di exclusividad estableci por escrito y huridicamente exigibel. Banda di esey e tamaño di e mercado interno, cual ta relativamente limita, hopi biaha ta hacie menos atractivo pa importadonan competi riba nivel di marca of producto. Na nivel di comercio di benta (detayista), tin suficiente competencia entre supermercado, supermercado den bario y minimarket.
– Importacion paralelo: Importacion paralelo6 por fortalece e competencia ‘intra marca’ pasobra esaki ta haci producto di e mesun marca bira disponibel via canalnan alternativo, fuera di e red di distribucion oficial. Den practica importacion paralelo ta accesibel principalmente pa supermercadonan grandi cu suficiente capacidad di compra y capacidad logistico. Tin indicacion cu cierto supermercadonan den bario y minimarket ta aplica importacion paralelo conhuntamente, pero dentro di e investigacion aki no por a establece e frecuencia di esaki cu certeza. A base di e datonan disponibel ta parce cu e efecto di importacion paralelo riba funcionamento general di mercado ta limita.
– Integracion vertical: Hopi distribuido ta activo tambe na nivel di benta directo na consumidor. Por ehempel via e modelo di Cash & Carry of Carry-out. E integracion vertical aki por resulta den riesgo pa competencia, pasobra distribuido integra tin e estimulo pa faborece nan propio puntonan di benta via prijs mas faborabel, miho disponibilidad of promocion exclusivo. Banda di esey nan ta dispone di informacion comercial di nan clientenan cu na mes un momento ta nan competido ora cu e distribuido ta participa den benta di producto directamente na consumido, loke por duna un bentaha strategico y por mas ainda aumenta e obstaculo di acceso na e mercado.
– Structura di prijs ypercepcion: For di datonan di Oficina Central di Estadistica (CBS) ta resulta cu supermercadonan grandi structuralmente ta mantene prijs mas abao cu
supermercadonan den bario y minimarket pa mayoria di categoria di producto, a pesar di e percepcion cu publico tin cu supermercadonan grandi ta mas caro. – Evaluacion encuanto competencia: E acuerdonan di distribucion cu a wordo investiga a demostra cu en general nan no ta contene limitacion di competencia, manera acuerdonan vertical di prijs, compra exclusivo of limitacion di importacion paralelo y cu esey riba nan mes no ta contra e Ordenanza encuanto Competencia. Ademas, desde cu e Ordenanza encuanto Competencia a drenta na vigor dia 1 di januari 2024, no tin indicacion cu distribuidonan local ta menasa detayistanan den caso cu nan ta hasi practica di importacion paralelo. Por ehempel (menasa di) boycot, nenga entrega di producto of otro sancion como reaccion riba importacion paralelo. Tabata tin señal cu tal conducta tabata existi prome cu 1 januari 2024.
5 Un mercado oligopolistico ta un forma di mercado unda un cantidad limita di empresa ta determina y suministra un parti grandi di e oferta. 6Importacion di producto di marca original fuera di e distribuidor oficial.
– Canasta Basico: E Canasta Basico, den su forma actual no ta ofrece suficiente proteccion contra cambio den prijs internacional y den practica distribuido of detayista ta keda evadi parcialmente e systema door di (1) e manera di calcula prijs pa cu productonan diCanasta Basico of (2) evita di importa e productonan riba e lista di Canasta Basico. Door di esaki no ta logra e meta di Canasta Basico, esta e disponibilidad di alimento basisco na un prijs abao. E instrumento di un Canasta Basico pa es motibo no ta efectivo y hasta por funciona como estorbo den mercado. P’esey AFTA ta recomenda pa reevalua e systema pa asina oferta y demanda, apoya pa competencia sano, por tuma e rol principal den garantisa un nivel pagabel di producto esencial na Aruba.
Conclusion
E investigacion aki ta mustra cu distribucion exclusivo, mas tanto den e forma di exclusividad factual, ta un caracteristica di e mercado di Aruba pa cuminda y productonan esencial. Hopi acuerdonan di distribucion ta anticua of a caduca, pero den practica ta sigui vigente pasobra distribuido local y distribuido oficial den exterior ta continua nan colaboracion exclusivo a base di relacion comercial estableci.
E structura di mercado aki ta ofrece bentaha: distribuido ta inverti mas den establece marca, mercadeo y logistica, loke ta conduci na distribucion mas eficiente y un oferta mas stabil. Ora detayista cumpra local, esaki por resulta mas faborabel pa e detayista door di e prijs di importation cu distribuido local ta disfruta danki na su relacion cu e distribuido oficial den exterior. Un otro bentaha di cumpra local ta cu detayista por cumpra cantidad mas chikito y cu menos riesgo. Na mes momento e sistema conoce tambe desbentaha. E acceso limita na importacion paralelo pa supermercado den bario y minimarket, y e ausencia di competencia intra-marca ta percura cu e mercado ta bira menos competitivo. Tambe esaki ta crea un obstaculo pa distribuidonan y importadonan nobo subi e mercado.
Aunke acuerdonan di distribucion exclusivo riba nan mes no ta prohibi door di e Ordenanza encuanto Competencia, e investigacion aki ta demostra cu e combinacion di exclusividad de facto, competencia ‘intra-marca’ limita, obstaculo halto di accesso na mercado y integracion vertical ta forma riesgo structural pa competencia sano. Importacion paralelo por fortifica e competencia ‘intra-marca’, pero den practica ta keda, pa via di bentaha logistico y di escala, mas tanto accesibel pa supermercadonan mas grandi. A base di e investigacion aki no por conclui cu acuerdonan di distribucion exclusivo ta forma un splicacion pa prijs relativamente halto di productonan esencial na Aruba. Pero si tin indicacion cu e relacionnan di distribucion exclusivo den combinacion cu un volumen reduci di importacion paralelo, ta contribui na prijs nan halto, sin cu necesariamente ta trata di un violacion di reglanan di competencia.
AFTA por lo tanto ta haci un yamada na partidonan den mercado pa notifica AFTA di acuerdonan exclusivo den distribucion di producto esencial na Aruba y sospecho di obstruccion di importacion paralelo cu ta wordo imponi door di distribuido oficial den exterior of distribuido local, principalmente den mercado unda ta trata di un competencia ‘intra-marca’ limita. A base di e notificacionnan aki AFTA por haci mas investigacion y si acaso ta necesario, actua aplicando e Ordenanza encuanto Competencia.
Siguiente pasonan y recomendacionnan
– Monitoreo permanente: AFTA ta conclui cu monitoreo permanente di acuerdonan di distribucion y conducta den mercado ta necesario pa garantisa competencia sano. Den esey ta importante pa no pone atencion solamente na acuerdonan formal, sino tambe na structura factual di e mercado y conducta cu den practica por limita competencia;
– Mantene importacion paralelo: Mantene y promove importacion paralelo ta esencial pa e mercado bira mas competitivo;
– Evaluacion Canasta Basico: AFTA ta recomenda un terminacion den fase di e productonan regula riba e lista di Canasta Basico, combina cu monitoreo y transparencia.