FTA a firma CAO nobo cu Manchebo Beach Resort & Spa Aruba

Diahuebs durante oranan di mainta a tuma lugar firmamento di un acuerdo collectivo (CAO) nobo pa e afiliadonan di FTA na Manchebo Beach Resort & Spa Aruba, cual lo drenta na vigor entrante 1 di Januari 2025 y lo termina dia 31 di December 2027.

Despues di un temporada di negociacion entre Manchebo Beach Resort y FTA, a logra sera un contrato collectivo, den cual miembronan di e empresa hotelero lo conoce varios adelanto, entre otro; ta inclui un aumento general pa duracion di e acuerdo, y ahuste den beneficionan secundario.

Pa e ocasion aki e CAO a wordo firma di parti Manchebo Beach Resort, General Manager: Edgar Roelofs y Director: Ton Kolman. Di parti FTA, Presidente: Hose (Jomar) Figaroa y Vice Presidente: Aldrick Pontilius.

Como testigo tawata presente durante e ceremonia protocolar pa firma e acuerdo collectivo, representando Manchebo Beach Resort, Manager di Recurso Humano: Sharline Leon, y pa FTA, Negociador Principal: Ryan Giel, Delegado Honorario na Manchebo: Swinda Koolman kende a bai recientemente cu pension, pero a forma parti di mayoria di e proceso di negociacion.

Tawata un ocasion ameno na cual tanto Gerencia di Manchebo Beach Resort y FTA a expresa nan satisfacion di por a logra sera un acuerdo collectivo pa e afiliadonan na e respectivo hotel pa e tres añanan venidero, como tambe e relacion cu e empresa hotelero tin cu e sindicato pa hopi aña.

FTA ta gradici e afiliadonan di Manchebo Beach Resort pa nan confianza pa por atende cu nan asuntonan laboral.
.
Nos ta presenta un resumen di foto, di e momento cu a tuma lugar firmamento di e acuerdo collectivo.