DTH ta sigui Kapasitashon Básiko di Hóreka pa fortifiká konosementu di siguridat di kuminda

KRALENDIJK- For di dia 5 te ku dia 9 di mei 2025 un delegashon di shete empleado di Direktorado di Supervishon i Mantenshon di Lei (DTH) a partisipá na e treinen básiko di hóreka na Aruba.

Meta di e kapasitashon tabata pa fortifiká konosementu i kolaborashon riba tereno di siguridat di kuminda i higiena. Durante e siman di trabou kompartimentu di konosementu tabata sentral. A dediká atenshon na desaroyonan nobo i mehorashon di sistemanan di traha, i a refreská e konosementu eksistente. 

E partisipantenan a profundisá nan mes den vários tópiko, entre otro alérgenonan, e eskala di pH, mikrobiologia, tumamentu di muestra di produktonan pa kome i bebe, kombatimentu di plaga, e kódigo di higiena i métodonan di inspekshon. A dediká atenshon tambe na trasabilidat i standartnan internashonal pa siguridat di kuminda. 

E konosementu atkerí ta bai bai haña su lugá internamente i lo keda kompartí ku koleganan via seshonnan interno i konsulta stratégiko. Esaki ta kontribuí na profeshonalisashon mas aleu di supervishon riba siguridat di kuminda i na kolaborashon ku e otro islanan. E kapasitashon tabata na enkargo di dos dosente di e Outoridat Hulandes pa Kuminda i Produkto (Nederlandse Voedsel- en Warenautoriteit – NVWA), ku a bini Aruba spesialmente pa esaki. Supervisornan di Aruba, Boneiru i Sint Maarten a partisipá na e treinen. A klousurá e siman ku entrega di sertifikado di e Kapasitashon Básiko di Hòreka na tur partisipante.

Mas kurso

Direktorado di Supervishon i Mantenshon di Lei ta sigui komprometé su mes pa desaroyo di su empleadonan. Den liña ku e programa di kapasitashon pa 2025, ta organisá mas treinen i kurso pa fortifiká ekspertisio di e tim mas aleu.     

1