Diahuebs nochi, 14 di november 2024, a tuma luga un debate electoral riba un nivel hopi profesional, caminda 10 lider politico a participa. Pa e debate aki tabata presente e lidernan di e partidonan politico ACCION 21, CURPA, Futuro, HTC, LPR, MAS, MEP, PPA, Raiz y RED. E debate a sirbi como un plataforma obhetivo pa tene discusionnan cu contenido riba un nivel halto, y trata un variedad di temanan cu ta di gran importancia pa nos comunidad. E temanan aki tin efecto directo riba e bida diario di tur hende na Aruba. Alabes, a duna votadonan un bista mas amplio riba e plan y vision di cada partido politico cu a participa.
E preguntanan cu a wordo haci durante e debate, a wordo formula cu cautela, enfocando riba e temanan mas urgente. Tur candidato a duna contesta riba e preguntanan haci y a demonstra di ta bon prepara. Esaki a duna claridad riba nan vision y plan di partido.
E debate asina a logra su meta principal: informa votadonan tocante e punto di bista y intencion di cada partido.
Riba plataforma digital a surpasa 35 mil views, y e hecho cu miles di persona a sintonisa via Tele Aruba, ta mustra cu e debate a conta cu un acohida grandi. Alabes, e anochi exitoso aki ta ilustra e importancia di un debate electoral y asina fortalece democracia y promove transparencia.
Structura di e debate
Presidente di KvK, sr. Diederik Kemmerling, a habri e anochi cu un discurso dirigi na e publico y a gradici e lidernan politico y candidatonan presente. E moderador, sr. Mark-Benson Denz, a introduci e lidernan y despues a duna instruccion di e debate y a guia e debate den bon forma.
E debate tawata consisti di 3 Tanda. E participantenan a wordo dividi den diferente grupo pa cada Tanda. E preguntanan tabata basa riba diferente topico cu ta concerni Aruba en general y a focus riba costo di bida, cuido medico y salud, siguridad y husticia, finansa publico, vivienda pagabel, reforma economico y laboral, turismo, medio ambiente y cambio di clima y enseñansa.
Cuidadanonan tambe a haya e oportunidad pa manda sugerencia di pregunta via e-mail. Tur participante a ricibi oportunidad pa duna contesta y despues pa elabora riba e pregunta o reacciona riba contesta di e otro participante.
Encuesta durante e debate
Durante e debate, a lansa diferente encuesta cortico unda a duna e oportunidad pa publico/televidentenan duna nan opinion riba diferente topico. Por a mira e resultado di e encuestanan cortico live. E resultadonan di e encuestanan cu a wordo haci durante e debate, pronto lo wordo publica riba nos website www.arubachamber.com.
Gradicimento
KvK kier gradici Tele Aruba, Setar y Universidad di Aruba pa nan colaboracion den e evento aki y pa haci esaki posibel. Un danki ta bay tambe na e lidernan politico y candidatonan cu a participa na e debate, Hyatt Place Aruba Airport y High Performance cu a percura pa un tremendo set up pa e evento. Un palabra di gradicimento ta bay tambe na tur medio di prensa presente y un y tur cu a sintonisa e debate.
