Cantidad grandi di droga haya den boto di un piscado

Kralendijk Boneiro: Despues di un investigashon intensivo di Kuerpo Polisial Hulanda Karibense (KPCN), a bin topa ku un kantidat grandi di droga den e boto di piskadó ku a konfiská riba djamars 18 di febrüari. Entretantu a destruí e droga i e boto.

Pa medio di un kolaborashon entre KPCN, Koninklijke Marechaussee, Duana i Wardakosta, a realisá tres detenshon riba djamars 18 di febrüari na Waf di Piskadó riba Kaya J.N.E. Craane. A detené un hòmber di 27 aña di edat di inisial M.N.C., un hòmber di 36 aña di inisial A.A.G. i un hòmber di 42 aña di edat di inisial R.E.D.W. pa violashon di Lei di Opio BES. Komo parti di e investigashon a konfiská un boto pa mas investigashon.