Boneiro: Noticia policial 27 te 30 di maart 2026

Notisia di polis di djabièrnè 27 di mart te ku djaluna 30 di mart 2026

Detenshonnan pa manehá bou di influensia di alkohòl
Den e dianan ku a pasa, polis a detené dos(2) shofùr pa manehá bou di influensia di alkohòl.

Djaluna 30 di mart, alrededor di 12 or di mardugá, ‘meldkamer’ sentral a risibí notifikashon tokante un aksidente riba Kaya Korona. Un outo a alkansá un persona den ròlstul. Na yegada di polis a topa ku e vehíkulo i e víktima enbolbí. E víktima tabata konsiente pero ku algun herida dor di e aksidente. Na promé instante e víktima ku outo a alkansá no tabata deseá asistensia médiko pero a logra konvensé i a transport’é pa hòspital pa tratamentu médiko. Shofùr di e vehíkulo no a mira e persona den ròlstul riba kaya i a alkans’é. Konforme e maneho di ‘botsen is blazen’, a hasi tèst di supla ku shofùr di e outo i a resultá ku el a konsumí mas alkohòl ku ta permití pa lei. A detené e dama di inisial A.H.N.C. di 31 aña di edat. El a haña prohibishon di manehá pa 1 ora.

Djasabra 28 di mart, alrededor di 3.05 or di mardugá, a detené un hòmber di inisial E.N.J. di 47 aña di edat na Hanchi Amboina. E sospechoso a dal ku su outo den un establesimentu di hóreka. Konforme e maneho di ‘botsen is blazen’, a hasi un tèst di supla i a resultá ku e sospechoso a konsumí mas alkohòl ku ta permití pa lei. Ademas e no tabatin reibeweis i e vehíkulo no ta segurá. Pa esaki e lo haña but.

A transportá ámbos sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.

Listramentu preventivo
Den oranan di mardugá di djadumingu 29 di mart, bou di enkargo di Ministerio Públiko (OM) a tene kòntròl na algun sitio den kuadro di listramentu preventivo. Durante e kòntròl aki a listra diferente persona i vehíkulo.

Durante e listramentu, a detené dos menor di edat pa poseshon di arma di kandela, despues ku a topa e arma den e outo ku e sospechosonan tabata move aden. Ta trata di un mucha hòmber di inisial R.M.W. di 15 aña di edat i un mucha hòmber di inisial I.I.M., tambe di 15 aña di edat. Ademas a topa ku un arma blanku den e vehíkulo. A konfiská ámbos arma i e vehíkulo pa mas investigashon. Despues di investigashon a resultá ku ta trata di un arma di kandela falsu.

Polis ta rekordá un i tur ku segun e lei di arma di kandela BES, ta den poseshon di un arma di kandela falsu tambe por hinkabo den problema ku hustisia i ta ilegal. Esaki pa motibu ku e ta paresido na un arma real i no por distinguí esaki den un situashon real.

Den un otro vehíkulo a topa i konfiská un mashin digital di pisa, ku ta usa pa pisa supstansianan nárkotiko.

Listramentu preventivo ta un instrumento importante den e lucha kontra poseshon di arma i otro ophetonan peligroso. Ku e akshon aki, polis ta enfatisá su kompromiso pa oumentá seguridat di siudadanonan i prevení echonan kastigabel.

Ladronisia for di negoshi
Djasabra 28 di mart a drenta keho di ladronisia for di un negoshi ku ta bende artíkulonan di sambuyá situá na Kaya Prinsès Marie. Un dama deskonosí a bai ku dos brel di sambuyá di e marka Siec, sin paga. Ta investigando e kaso.

Kiebro na akomodashon turístiko
Djasabra 28 di mart a drenta keho di kiebro na un akomodashon turístiko na Bulevar Gobernador N. Debrot. Deskonosínan a haña akseso na un apartamentu i a bai ku un lèptòp ‘Apple MacBook Pro’.

Djasabra 28 di mart a drenta keho di kiebro na e mesun akomodashon turístiko na Bulevar Gobernador N. Debrot. Deskonosínan a haña akseso na un otro apartamentu i a bai ku dos lèptòp di e marka HP ‘Notebook’, un yabi di outo i sèn kèsh.

Ta investigando ámbos kaso.

Ladronisia di baiskel (E-Bike)
Djabièrnè 27 di mart a drenta keho di ladronisia di un baiskel (E-Bike) koló blou di marka ‘Spyder Wheels’, ku tabata stashoná na altura di un establesimentu di hóreka na Bulevar Gobernador N. Debrot. Ta investigando e kaso.