Billy Valentijn bèk na Boneiru despues di 23 aña: “Un soño a bira realidat”

KRALENDIJK – Despues di un biahe di mas ku djesocho ora Billy Valentijn a yega Aeropuero Internashonal Flamingo djamars anochi kuartu pa ocho. A transportá e Boneriano, ku a bandoná su isla 23 aña pasá, drumi ku buelo di KLM 769 debí na su situashon médiko: e ta sufri di kontrakshonnan muskular. Valentijn tabatin un soño ainda. Landa den e awanan blou di Boneiru. E siman benidero esaki ta bira un realidat p’e.

E biahe a kuminsá djamars mainta 7’or na Hulanda (1’or di madrugá ora lokal). A hiba Valentijn Schiphol ku ambulans, kaminda el a bula pa Boneiru via Aruba. Na yegada un grupo grandi di famia i amigu a bin top’é. Por a nota hopi emoshon i alegria. Diputado Nina den Heyer tambe tabata presente pa yam’é bonbiní riba e isla.

Ounke KLM tabata reservá den duna komentario – probablemente pa motibu di e kontroversia rondó di e preis di pasashi di 39.000 euro – e kapitan di  buelo a duna tòg un reakshon kòrtiku. “Tabata un bon buelo i mi ta kontentu di mira tantu kara kontentu na aeropuerto,” segun e kapitan. Un stewardess a añadi: “Henter e biahe el a keda wak e nubianan pafó.”

Resepshon festivo

Na aeropuerto un multitut grandi a bai risibí Valentijn. Despues di e resepshon e ambulans di deseo a sali direkshon di Eden Beach kaminda e ta bai keda i ku su famia a dekorá den un forma festivo. Den un kòmbersashon ku su ruman muhé Hailine Robin-Valentijn i su prima Evelin Valentijn anteriormente ayera a sa kon spesial e momento aki ta pa e famia.

“Si, nos tur ta kontentu ku e por a bolbe despues di 23 aña,” Hailine ta bisa. “Nos sa ku no tabata fásil pa regla tur kos, p’esei nos ta hopi agradesido na tur ku a yuda. Spesialmente Molina i Ingrid a traha hopi duru, ku meil, yama, buska hende …. berdaderamente super.”

Un deseo di hopi tempu

Primu Mayron Sint Jago tambe tabata visiblemente emoshoná durante e yegada na aeropuerto i tabata papia di e kaminda largu pa yega na e momento aki. „Ora e idea a nase, nos a wak mésora kon nos por a tene akshon. Via Facebook mi a inisiá un akshon pa kolektá sèn, pasobra e pasashi tabata hopi karu,“ e ta konta.  „A dura hopi pa nos a yega asina leu.“

Un di e motornan tras di e regreso ta boluntario David Molina ku for di 2018 ta embolbí ku e inisiativa. “Nos tin shete aña ta traha riba esaki,” e ta konta. “Tin biaha mi tabata pensa: e no ta bai logra. Pero despues mi ta mira Billy online i e ora ei mi tabata sa: e ta bon na tinu, e ke esaki. I e ora ei bo ta bisa bo mes: no entregá, nos ta ban traha riba dje.” 

Segun Molina e momento aki mester inspirá hende. “Mi bida ta konsistí di momento. I bo mester gosa di kada momento. Esaki ta un momento asina.”

Rekuerdonan kaluroso

Hailine ta konta ku antes e tabata biba ku Billy, nan mama i un ruman hòmber mas. “Ora el a sali pa Hulanda dia 2 di yüli 2001, e tabatin djeskuater aña. Ami tabatin djesocho aña i tabata na estado di mi yu hòmber mayó. Despues, nuebe aña pasá, mi a bai bishit’é na Groningen.” E ta konta tambe kon tur djasabra e tin kontakto kuné via Facebook Messenger. “Nos ta papia e ora ei ku henter famia via un grupo, i semper na Papiamentu.”

E tin bunita rekuerdo di Billy su hubentut na Boneiru. ”Billy tabata semper kontentu. Nos tabata bai laman hopi huntu. E tabata hari hopi i nunka e tabata rabiá.” Un algu chistoso tokante un bòter di refresko ku Hailine a kaba bebe mientras ku Billy a kaba pishi den dje un ratu promé – ta motibu pa un sonrisa. ”El a hari su morto i a bisa: ”Esei ta nèt bon pa bo!”

Plannan pa futuro na Boneiru

E simannan benidero e famia ke pasa hopi tempu ku Billy. “Nos ta bai Sorobon sigur, pasobra e tin gana di drenta e awa blou. Esei ta su soño,” Hailine ta bisa. Prima Evelin ku huntu ku Hailine a drecha e kamber di Billy ta entusiasmá. E ta kòrda Billy di un bishita anterior, ounke e tabata chikitu ainda. “E ta mi tio. I nos tur dos gusta pinta,” e ta bisa. “Ora e t’ei mi ta bai pinta huntu kuné. Esei ta bira algu spesial.”

A yega kas

E famia ta klaramente orguyoso i emoshoná.”Tur hende a puntra: ‘Ki dia e ta bini porfin?’,” segun Hailine. “Awor ku e momento a yega, nos ta spesialmente agradesido i kontentu. No tabata fásil, pero el a logra.”  Un bonbiní spesial pa un regreso spesial – porfin Billy ta na kas atrobe.

1