Connect with us
MVP Ad

TA USA SKOLNAN KOMO KUNA PA REKLUTÁ MIEMBRONAN DI GÈNG

Local

TA USA SKOLNAN KOMO KUNA PA REKLUTÁ MIEMBRONAN DI GÈNG

TA USA SKOLNAN KOMO KUNA PA REKLUTÁ MIEMBRONAN DI GÈNG

TA USA SKOLNAN KOMO KUNA PA REKLUTÁ MIEMBRONAN DI GÈNG – WILLEMSTAD.- Formashon di gèng ta birando dia pa dia un problema mas serio den komunidat. No solamente polis tin su mannan yen ku e problemanan di kriminalidat ku e gèngnan aki ta okashoná, pero tambe na skolnan tin problema serio ku e asuntu aki.

Di otro banda miéntras ku gèngnan ta bira mas i mihó organisá, kuerpo polisial tin problema pa reklutá miembro nobo. Asina EXTRA por komprondé for di fuentenan verídiko den kadena hudisial.

Resientemente tabatin un presentashon di e problemátika di gèng pa minister di Hustisia, Quincy Girigorie i sugerensianan kon pa kuminsá ataká e problema ku gèngnan ta okashoná den komunidat. Un di e arianan prinsipal ku a señalá pa ataká e problemátika di gèng ta nos skolnan. Mas i mas skol ta birando e kuna pa reklutá mas miembro hóben pa gèng.

Skolnan mes tambe ta man na kabes ku e problema aki. Alumnonan ku no ta komportá nan mes no ta respetá ni nan propio mayornan. Esaki ta laga e edukadónan ku un problema serio di mantené órden na skol.

E problema aki ta konta aun mas tantu pa skolnan den bario. Tin poko bario notorio kaba pa asuntunan di gèng. E komportashon di gèng ta bayendo asina leu ku tin kontròl den e barionan aki ki tipo di muzik ta toka. Asta tin kasonan konosí ku ta para outo pa bisa e outomobilista ku den e bario ei no por toka sierto muzik.

Durante karnaval e problema ku gèngnan ta forma pa komunidat a bira bisto pa e públiko general. E promé insidente tabata durante festival di tumba ora ku un persona a subi riba tarima pa reklamá loke un kantante tabata kanta durante warm-up di su banda. Durante marcha grandi tabatin tambe diferente suseso riba e ruta entre siudadanonan i agentenan polisial.

Aparte ku e grabashonnan aki a lanta interogashon riba e forma ku e polisnan a atendé ku sierto di e konfrontashonnan aki, el a duna tambe un bista di e tenshon ku tabata reina riba kaya entre miembronan di e gèngnan aki i kuerpo polisial.

Polisnan en general no ta sinti nan sigur mas riba nan trabou. No solamente e situashon di kriminalidat ta hopi eksplosivo, pero tambe e polis tin preokupashon ken ta su partner riba trabou. Esaki ta un indikashon ku e situashon den kuerpo polisial tambe e problema di mundu baho ku a meskla ku ariba a manifestá su mes.

E situashon di insiguridat bou di agentenan polisial a bira asina serio ku mira un oumento di kantidat di polis ku ta disidí di bandoná e kuerpo pa e motibu aki. Vários di nan ta bai Hulanda pa por kontinuá ku nan karera.

Miéntras ku e gèngnan pues ta ganadó tereno lokalmente kuerpo polisial tin problema pa haña miembro nobo pa keda kumpli ku nan tarea di sirbi i protehá. EXTRA tin entendí ku den e último intento pa reklutá aspirante polis nobo kasi 90 porshento no a pasa dor di “screening” pa nan por inisiá un trayekto na skol di polis.

Di alrededor di 200 kandidato ku a mèldu ta apénas un klas di alrededor di 25 kandidato por a forma. Ta wak direkshon di minister di Hustisia pa bini ku solushonnan riba término kòrtiku. Sinembargo Girigorie su reputashon no ta traha na su fabor, esta e no ta konosí komo un minister ku ta atendé ku asuntu di forma diligente.

Un ehèmpel di esaki ta e maneho di imigrashon. Te ainda sektor komersial ta sklama pa un maneho pa transparente i mihó deliniá pa asina fasilitá invershonnan for di eksterior den nos ekonomia. Otro ehèmpel ta e 600 kilo di kokaina ku a disparsé for di warda di polis ku te ainda e minister no por duna klaridat riba e investigashon interno ku a hasi riba proseduranan den e kuerpo. Pensamentu ta tambe ku e minister no tin e kurashi pa atendé ku esnan responsabel den tòp di maneho di kuerpo polisial i tene nan responsabel pa loke a bai robes.

Un di tres ehèmpel ta e problema di kapasidat pa sera personanan indokumentá. Ta laga tur e problema konsentrá na baraknan prizòn ku e konsekuensia ku tin huida i intento di huida ku a tuma lugá kaba. Awor e minister a instalá un tim di krísis pa tuma medida kontra wardadónan di prezu ku a faya.

Pero den pasado e minister mes no a duna sosten na gerensia di prizòn ora ku nan a tuma pasonan disiplinario kontra e personal ku ta fayando i trese peliger den e instituto. Ehèmpelnan ta desishon di gerensia pa apliká “no work no pay” ora ku personal drenta akshon, pero minister ta disidí di paga salario kompletu tòg. Tambe tin kaso di suspenshon disiplinario di personal ku gerensia a tuma ku minister no a sostené e gerensia den dje i trahadónan por a regresá manera nada a pasa.

Por último por menshoná e “sofware” ku ta bai atkerí pa atendé ku problemátika di “drone” ku ta baha den prizòn. Algu ku gerensia tin 2 aña ta sklama pe te awor numa ku baka kasi a hoga na pos i a gara prezu ku arma di kandela den nan sèl desishon ta kai pa bai buska e “software” aki.

Continue Reading
Advertisement
You may also like...

More in Local

MVP Ad
To Top
How to whitelist website on AdBlocker?

How to whitelist website on AdBlocker?

  1. 1 Click on the AdBlock Plus icon on the top right corner of your browser
  2. 2 Click on "Enabled on this site" from the AdBlock Plus option
  3. 3 Refresh the page and start browsing the site
Close
error: Content is protected !!