Ta importante pa siña conoce e personanan cu tin autismo y inclui nan den desaroyo y oportunidad cu tin na Aruba

Riba Dia Mundial di Autismo, Prome Minister Evelyn Wever-Croes ta pidi comunidad pa ban para keto un rato, y puntra nos mes, cu como ciudadano, como gobernante, como pais, y como mundo henter, kico cada un di nos por haci pa mehora e calidad di bida di esnan cu tin autismo.

Prome Minister a indica cu Aruba, mescos tur otro pais tin un cantidad basta grandi di personanan cu tin autismo, y e cantidad di mucha cu ta wordo detecta cu e condicion aki ta creciendo. E motibo di e crecemento aki ta, cu awendia mayornan ta poco mas inclina pa laga haci e test pa establece di trempan si nan yiu tin autismo. Esaki ta importante, mirando cu unabes e mucha wordo detecta di tin autismo, mayornan por avisa scol pa asina e mucha haya di trempan e ayudo necesario y debido.

“Mi kier pidi tur ciudadano di nos isla, pa siña conoce e personanan cu tin autismo, paso cada un di nan ta diferente. Tur tin diferente habilidad, talento y necesidad, y pese’y ta importante pa siña conoce y tratanan mescos cu nos ta trata cualkier persona sin autismo. Mescos cu nos, nan tambe tin e derecho di ta inclui den e desaroyo y oportunidadnan cu tin na Aruba” Prome Minister a expresa.

Como muestra di sosten, lo cende e lusnan na bestuurskantoor. Tambe, Gobierno di Aruba riba e dia di awe, ta reactiva e comicion nacional di autismo, cu lo yuda cu un plan integral di con pa yega na mehora calidad di bida na Aruba, di tur persona cu tin autismo.