Connect with us
MVP Ad

SITUACION DI ASILO TA DEMANDA HOPI ATENCION Y GOBIERNO TIN TUR ATENCION PE

Caribean

SITUACION DI ASILO TA DEMANDA HOPI ATENCION Y GOBIERNO TIN TUR ATENCION PE

SITUACION DI ASILO TA DEMANDA HOPI ATENCION Y GOBIERNO TIN TUR ATENCION PE

SITUACION DI ASILO TA DEMANDA HOPI ATENCION Y GOBIERNO TIN TUR ATENCION PE – ORANJESTAD – Momento cu Gabinete Wever Croes a asumi responsabilidad gubernamental, a bin topa cu un situacion sin precedente, segun Minister di Husticia mr. Andin Bikker.

E situacion aki ta relaciona cu e cantidad di Venezolano cu ta drenta Aruba y pidi asilo. Segun e mandatario di Husticia, e tempo aya Aruba tabata haya un averahe di uno of dos aplicacion di asilo pa aña, pero ningun momento por a pensa cu e lo bay demanda hopi atencion.

Tempo cu Aruba a haya su Status Aparte na 1986 a forma parti di e tratado pa loke ta trata refugiado y na aña 2009 den Toelatingsbesluit a bin cu un articulo 19 cu a tene cuenta cu e tratado aki. Mirando e situacion aworaki e tempo ey ningun persona of Gobierno por a biba pensa cu ta bay tin un situacion di refugiado.

Durante gobernacion den e temporada di mei na 2018 e Gobierno aki a haya su mes confronta y manera un rush, caminda diferente persona den desesperacion a dicidi di bay aplica pa asilo.

Dor cu esaki tabata algo sin precedente a haci un estudio kico mester tuma lugar y den e LTU a bin constata cu na 2011/2012 den Parlamento no a haci ningun cambio.

Na december 2018 Minister Bikker a bay Parlamento y a bin cu base huridico pa loke ta trata e parti di tratado internacional cu ta den articulo 20. Los di esey a bay over pa cambia e maneho pa adapta articulo 19 di Toelatingsbesluit.

Pa loke t’e tema di Venezuela esaki ta tumando hopi tempo mes. E situacion aworaki ta increibel, pasobra mester goberna pais Aruba pa retonan interno y na mesun momento mester atende cu un reto cu no ta di pais Aruba, pero di un problema social hereda.

E situacion aworaki ta, cu e grupo di persona cu a bin cu boto ilegal, nan a indica cu nan kier pidi asilo. Basa riba e tratado articulo 19 Huez Comisario a bisa si nan kier pidi asilo nan mester haya un meldplicht y no por deporta nan.

E decision aki a causa hopi conmocion den comunidad segun Minister Bikker. No obstante esey ta haci separacion di poder y respeta e decision di Corte, y cumpli cu esaki.

Pero di biaha tambe urgentemente diasabra atardi a reuni cu e diferente departamentonan cu ta atende cu e problematica di asilo.

Den e reunion a delinea kico t’e pasonan cu ta bay tuma den bista di esaki.

Na Hulanda tin un asina yama Schiphol Model. Ora un persona yega na Schiphol y e pidi asilo, no t’asina facil p’e haya asilo, pero ta tuma 28 dia maximo. E prome 8 dianan nan ta screen si e persona tin derecho legitimo y merito pa pidi asilo.

Segun Minister Bikker, aworaki ta observando si ta bay cu e Schiphol Model, pasobra a haya un hala di aplicacion desde mei 2018 bin ariba unda centenares di persona a aplica pa asilo.

E tratado ta bisa cu no por manda e personanan aki bek pa pais di procedencia, pasobra e ora ta actuando contra e tratado, pero mester bay den e proceso pa evalua nan peticion.

Sinembargo por a bin ripara cu gran mayoria di e peticionnan aki, e personanan ta haciendo maluzo di e proceso di tanto e asilo como e tratado.

Segun Minister Bikker, hopi di e ilegalnan aki, ora Warda nos Costa of Polis haya nan ta traha di ripiente nan ta pidi pa aplica pa asilo.

Obviamente un persona cu for di 2016, 2017 ta ilegal na Aruba y na 2018 of 2019 e ta ser haya ta traha, di ripiente e ta bin pensa cu e mester di e asilo.

Cu ayudo di Hulanda na cuminsamento di e aña aki a train un grupo di 10 persona pa yega na un unidad di asilo. E grupo aki hasta den fin di siman nan ta traha pa procesa tur e aplicacionnan na un manera rapido y responsabel.

Fuera di e procesamento, constantemente mester reuni cu UNHCR, Cruz Cora Internacional y ora un mandatario di Hulanda bin Aruba e topico di Venezuela ta riba agenda grandemente. Asilo politico di Venezolanonan constantemente ta demanda hopi atencion y Gobierno tin tur atencion pe segun Minister Bikker.

 

More in Caribean

MVP Ad
To Top
How to whitelist website on AdBlocker?

How to whitelist website on AdBlocker?

  1. 1 Click on the AdBlock Plus icon on the top right corner of your browser
  2. 2 Click on "Enabled on this site" from the AdBlock Plus option
  3. 3 Refresh the page and start browsing the site
Close
error: Content is protected !!