Connect with us
MVP Ad

RICH KALASH PROHIBÍ PA AKTUA DURANTE ‘BOSS NIGHT’

Caribean

RICH KALASH PROHIBÍ PA AKTUA DURANTE ‘BOSS NIGHT’

RICH KALASH PROHIBÍ PA AKTUA DURANTE ‘BOSS NIGHT’

RICH KALASH PROHIBÍ PA AKTUA DURANTE ‘BOSS NIGHT’ – KRALENDIJK.– E konosido rèper Rich Kalash no por aktua mas durante ‘Boss Night’ ku mester a tuma lugá djasabra 8 di yüni na Club Soho. For di 17 di aprel e organisadónan a hasi petishon pa e evento aki i pa nan sorpresá djaluna nan ta haña un karta di gezaghebber den kua pa motibunan di siguridat ta prohibí aktuashon di Kalash.

Esaki a trese kuné ku e organisadónan a disidí ku no ta kontinuá mas ku e evento. E organisadónan a hasi hopi gastu na promoshon, firma kontrakt i otro gastunan, pa e siman aki numa bin tende ku no ta permití e rèper aktua na Boneiru. Nan ta pensando seriamente pa kana e kamindanan legal pa asina por logra haña e loke nan a invertí pa ku e evento.

Gezaghebber den su karta ta skirbi dia 17 di aprel Rodrigues Import a hasi petishon pa un pèrmit pa e evento ‘Boss Night’ dia 8 di yüni na Club Soho na Kaminda Lac. Durante e anochi ta bai tin aktuashon di algun Dj i rèper bou di kua aktuashon di Rich Kalash.

Gezaghebber ta skirbi: ‘Pa tratamentu di e pèrmit a pidi konseho serka e sekshon di leinan partikular di Kuerpo Polisial Karibe Hulandes. A base di e informashon mi persona komo gezaghebber di Boneiru, enkargá ku òrdu públiko i siguridat na Boneiru a risibí, a disidí ta prohibí aktuashon di Rich Kalash durante e evento ‘Boss Night’ riba 8 di yüni’.

A base di artíkulo 174 di e lei di e entidatnan públiko, Sint Eustatius i Saba, Wol- BES, gezaghebber ta sigui, e ta enkargá ku mantenshon di lei di òrdu públiko. A base di artíkulo insiso 3 di artíkulo 174 WolBES, na desekilibrio di òrdu públiko òf na miedu serio pa okashoná insiguridat, ta duna rekomendashon ku e ta haña nesesario pa mantenshon di lei di òrdu públiko.

E promé mandatario ta mustra e organisadónan ku violashon di e prohibishon aki por okashoná delito. Gezaghebber ta sigui skirbi, for di informashon di Polis, a sali na kla ku tin rísiko serio di siguridat relashoná ku aktuashon di e rèper Rich Kalash. E miedu serio pa iregularidat tin di haber ku konfliktonan anterior entre diferente gèn i grupo violento na Kòrsou. E miedu ta konsistí ku bou di bishitantenan di e evento por sòru pa iregularidatnan serio.

Insidentenan di tiramentu anterior i e echo ku Rich Kalash den un entrevista mes a duna di konosé di ta blanku di posibel gènnan kriminal, a kondusí ku komo gezaghebber el a tuma e desishon pa prohibí aktuashon di Kalash, gezaghebber ta skirbi.

Den un entrevista ku e organisadónan tabatin ayera mèrdia na Live 99.9 FM, nan ta lamentá e desishon aki di gezaghebber, mas ainda e tempu kòrtiku ku e desishon a yega serka nan. Nan a invertí hopi plaka den promoshon, hasiendo gastunan pa organisá e evento pa den pitu haña un sla duru asina.

E promotornan a duna di konosé ku nan no ta lag’é te aki. Nan ta bai tuma e pasonan hurídiko pa asina eksigí pago di e gastunan ku nan a hasi pa e evento. Entre tantu a tuma e desishon tambe ku e evento ‘Boss Night’ no ta sigui mas.

More in Caribean

MVP Ad
To Top
Close
error: Content is protected !!