4
Prome Minister a reuni cu señora Marian Kamstra
ORANJESTAD – Prome Minister Evelyn Wever-Croes a reuni cu señora Marian Kamstra cu ta director di Westelijk Halfrond na ministerio di Relacion Exterior. Prome Minister a indica cu señora Kamstra ta hopi instrumental den e maneho di Relacion Exterior pa loke ta trata pais Aruba, y p’esey durante e reunion a bay den hopi detaye riba diferente aspecto cu ta e retonan riba relacion exterior. Sigur un reunion hopi inforamtivo mirando cu señora Kamstra tabata tin hopi informacion cu Gobierno tin mester.
Situacion na Venezuela
Prome Minister a expresa cu un di e temanan cu a bin dilanti durante casi tur e reunionnan ta e tema di e situacion na Venezuela. Hulanda ta keda para riba cu nan no ta reconoce Presidente Maduro como presidente y ta sostene e rapport di Nacionnan Uni cu ta indica cu ta señor Edmundo Gonzales a gana e eleccion na Venezuela. Esaki sigur ta hinca Aruba den un situacion dificil riba tereno diplomatico. Tambe Venezuela a expulsa personal di embahada, cual no a haci mucho efecto, pero si ta subi e peso di trabou pa esnan cu a keda, y esaki ta trece hopi tension.
E relacion entre Hulanda y Venezuela no ta “business as usual” y aki ta unda ta importante pa nos na Aruba ta consciente di kico por y kico no por. Mientrastanto e violacion di derecho humano y varios detencion politico na Venezuela ta problemanan cu Hulanda tin pa cu e situacion. Prome Minister a expresa di ta spera cu pronto por bin un solucion pa asina e situacion por normalisa.
Migracion
Prome Minister a splica cu otro tema importante cu nan a papia riba dj’e ta e tema di e migrantenan. Manera ta conoci e presidente di Merca a tuma e decision di retira e fondo cu ta wordo duna na USAID. Esaki sigur tin su efecto, mirando cu ta e organisacion aki ta esun cu ta yuda organisacionnan manera Nacionnan Uni y/of HIAS cu ta duna asistencia na migrantenan na Aruba tambe, cu fondo. Debi na e situacion, hopi ta e organisacionnan cu ta brinda e ayudo, mester a cera nan porta.
Na Aruba nos ta consciente cu nan ta haci un trabou hopi grandi pa Aruba y cu tin un staff local cu ta traha cu alma y cuerpo pa esnan cu tin mester. Gobierno di Aruba ta purbando na yega na un solucion pa mantene e staff aki pa nan por sigui duna e servicio cu nan a bin ta duna pa hopi aña.
Derecho di hende muhe
Derecho di hende muhe ta otro tema cu a pasa riba dje durante e reunion. Señora Kamstra ta un persona cu semper a promove e maneho y derecho di hende muhe, y aki ta unda Prome Minister semper a hiba un papel prominente pa henter Reino.
“E reunion aki tabata uno hopi positivo. Mi a informa nan si cu Aruba tin un Gobierno den formacion y esaki ta algo pa nan tene cuenta cu ne. Pero mientras mi ta Prome Minister di pais Aruba, aunke ta demisionario, mi lo sigui haci e trabounan cu mester wordo haci. Kico cu ami por haci pa fortifica derecho di hende muhe lo mi sigui haci,” Prome Minister a expresa.
