Connect with us
MVP Ad

RACHELLE LE BLANC; AKTRIS YU DI KÒRSOU NA MERKA

Local

RACHELLE LE BLANC; AKTRIS YU DI KÒRSOU NA MERKA

RACHELLE LE BLANC; AKTRIS YU DI KÒRSOU NA MERKA

RACHELLE LE BLANC; AKTRIS YU DI KÒRSOU NA MERKA – Rachelle (Shelly) le Blanc a kaba New York Film Academy (NYC) ku un aña di aktuashon den konservatorio di pelíkula. E ta formando parti aktualmente di diferente obra na Merka, hasiendo su karera den aktuashon. Rachelle ta yu di Kòrsou ku 7 aña pasa a bai biba Merka, terminando su estudio di merkadeo, maneho di media i aktuashon.

Despues di a gradua na NYFA, durante i despues di e programa di master el a aktua den diferente pelíkula di studiantenan, webseries i pelíkulanan independiente kòrtiku. Na 2017 el a keda nominá komo mihó aktris den “supportive role” pa Urban webseries Awards. Tambe e tabatin un ròl komo invitado den Daytime Emmy Nominated webseries Yough Love. Ta esaki ta nos Shelly i Djasabra a papia kuné, te na New Jersey kaminda e ta residensia aktualmente.

Deseo di ser aktris for di chikí

Rachelle a konta nos ku ta un trayektoria largu el a pasa dor. For di chikí semper el a bisa di ke bira aktris. Su amiga Krishna a kòrd’e un bia ku ta for di dia e tabata den 1ste klas, ku su seis aña el a bira ku ta aktris e ke bira. Rachelle a laga su mayornan komprondé ku ta Merka e ke bai studia pa e bira aktris profeshonal. Pero asuntu di Visa a want’e un poko i el a bai UNA na Kòrsou studiando maneho i despues si a bai Merka pa sigui den e área di maneho. Na Kòrsou el a haña su Bachelor i despues a bai pa su master na Florida kaminda el a biba 2 aña i mei i despues di tabata kla ku maneho el a bai pa aktris. El a muda pa New Jersey i a bai skol na New York.

 

Saka emoshon

Shelly a bisa ku dia el a kuminsá e no por bisa ku ta loke el a spera ni loke e no a spera. E no a realisá ku komo aktris bo tin di bai profundo den bo mes. Na Kòrsou komo aktris el a keda hopi superfisial ku su karakterístikanan pero einan el a siña ku e tin di bai profundo. “Komo hende tin biaha nos tin sierto emoshonnan ku nos no ke dil kuné i nos ta skonde i sigui biba nos bida. Pero den aktuashon nan a fòrsa mi pa dil ku sierto emoshon pa trese nan dilanti ku sierto ròlnan ku mi ke hasi den futuro. Esaki mi no a ferwaktu”.

Ku esaki Rachelle a splika ku tin diferente téknika ku aktornan ta usa pa nan bira e ròl ku nan mester bira. Tin hende ta usa e téknika di supstituí e persona  bo dilanti i tin otro hende ku ta krea nan imaginashon. Por ehèmpel nunka e no a haña yu i pa hunga un ròl di mama e tin di kambia henter su realidat pa e por sinti kiko ta nifiká haña un yu. I asina e por bisa ku mayoria e ta usa supstitushon i el a hañ’e ku algun ròl ku a fòrs’e di bai bek den pasado i sinti atrobe sierto emoshonnan ku e no kier a sinti i ku e no a dil apropiadamente den pasado. I asina bo ta haña sanashon ora bo ta hungando sierto ròlnan pasobra bo tin di dil ku emoshonnan i pa sigui padilanti.

 

No ta fásil

Ser aktris no ta asina fásil , ser bunita, bon aparensia i bon kondishon ta yuda bu yega leu. Bo kara i aparensia nan ta mira promé. Pero bo por ta kon bunita ku bo ke, bo por papia kon bon ku bo ke, bo por siña e ‘lines’nan manera mester ta, pero si bo no por trese e ròl dilanti i bo no por ta konvinsente nan ta laga bu bai.

 

Diferente ròl

Den e 7 aña ku Shelly tin na Merka, e delaster 5 aña el a dediká na aktuashon. El a kuminsá den pelíkulanan di studiante. Esaki komo e no tabatin masha eksperensia den obranan teatral. Na Kòrsou el a yega di partisipá den e obra “mara bo por muri” i tambe el a partisipá den Arte di Palabra pero esei no tabata sufisiente. I asina el a partisipá den e pelíkulanan di studiante, Ta trata di pelíkulanan traha pa studiantenan ku ta hasiendo kareda den produkshon di pelíkulanan. Despues di a kaba NYFA el a haña un ròl den un webseries Tough Love. Esaki tabata su promé trabou despues di a kaba skol i el a keda nominá Emmy. El a sintié hopi orguyoso di por a kai den un produkshon nominá. Despues a sigui otro webseries Da Brooklyn Way kaminda el a keda nominá komo Best suporting actris na 2017. Tambe Shelly a krea su propio pelíkula Birthday Wish ku tin un teaser aktualmente ku por wak riba Youtube tambe. E tin un seri digital Bubbly Brown Sugar ku tambe Shelly a aktua den dje i kaminda e tabata e mènedjer di produkshon. Tin otro ku ta The Probe ku por bai yega televishon i den e produkshon aki Shelly tabata huntu ku Gary  Sturgis, un aktor konosí di e pelíkula A Diary òf a Mad Black Woman huntu ku Tylor Perry.  Tambe el a workshop ku Tasha Smith ku ta den “why did I get married”. Tasha a wak su aktuashon i a duna Shelly algun krítika konstruktivo.

 

Shelly ta mira su mes riba pantaya grandi pero e no sa ku ta esei Dios tin pe. Ainda e tin di sigui bai lès. E ta trahando hopi duru pa yega einan. E mesun webseries nominá pa Daytime tabata na televishon na yanüari. “Nos ta kuminsando”, asina Shelly a bisa na Djasabra.

 

Oportunidat

Di awor aki pa futuro, segun Shelly e ta trahando hopi riba proyektonan independiente. Nan mes ta hinka pen den nan proyektonan i krea esakinan. Por ehèmpel Birthday Wish ku e mes a skibi i e tin un  tim trahando kuné ku kámara i direktornan na su disposishon. E ta djis yama su amistatnan i nan ta yud’e. I meskos e ku nan. Awor aki ta besig ku esei i e tin oudishonnan pendiente i hasiendo aktualmente. Shelly ta spera ku pronto Kòrsou por mira diferente proyekto ku e ta parti di dje i e lo sigui krea te ora un hende mira kiko e ta hasi i tur su potensialnan. E ta krea su mes oportunidat te ora un hende grandi dun’é oportunidat. E ke keda Merka pasobra el a ripara ku na Kòrsou nos industria di trahamentu di pelíkula a kuminsá krese pero semper el a deseá di ta einan i ta na Merka e por hasié. E ke bin Kòrsou i forma parti di produkshonnan lokal pero e ta kere na Merka e ke gana su pan di kada dia.

 

Produkshon na Kòrsou

Shelly tin algun idea den mente pa ku Kòrsou. E no ke kompartí esakinan ainda. Definitivamente e ke filma algu na Kòrsou. El a papia ku e tin algun hende di su tim kaba pa e por filma algu aki mes. Den su tim semper e ta papia di Kòrsou. E ta promové Kòrsou i ke bin Kòrsou i filma algu. Ora e ta sintié kla i ku e tin tur e konosementu nesesario e ke kompartí esaki ku personanan ku ke bira aktor profeshonal.

 

Loke bo lucha pe bo ta balorá

Ora ta skohe estudio e por bisa ku e edat di 20 pa 30 aña ta un edat hopi krusial pa kiko skohe i hopi biaha no sa ki direkshon tuma. Un kos ku el a keda firmemente para riba dje i su mayornan a push’e den dje ta pa sigui e deseo di su kurason. Si ta aktor bo ke bira dal bal, e no ta fásil. Den tur tin opstákulonan den kaminda pero kiko ta bida sin opstákulo. Tur kos ku bo haña fásil bo ta pèrdè fásil i loke bo traha duru pe lo bo sa di balor’é. Shelly su trayektoria no tabata fásil na Merka pero e ta siguiendo su kurason i ta firma ku Dios su boluntat lo keda hasi. I e ta kere ku e boluntat lo ta pa e ta aktor.

 

Trabounan di Rachelle (Shelly) Le Blanc

 

New York Film Academy (NYC) – 1 year acting for film conservatory.

– Tasha Smith Acting Workshop (Tasha Smith di Why Did I Get Married)

 

Tough Love (Season 1 Episode 3): Supporting Actress

– Tough Love ta un Daytime Emmy Nominated Webseries
https://www.youtube.com/watch?v=DpZUwLakly8

 

Da Brooklyn Way (Season 1 Episode 3, 4, 6, 8,10)

– Mi a keda nominá komo best supporting actress dor Urban Weberies Awards

 

Despair (Leading Actress)

– E shòrt film aki ta un selekshon ofisial den 6  film festival:

  • International Christian Film Festival (Nan a pasa e pelíkula na Orlando),
  • Inspired Faith Film Festival (Nan a pasa e pelíkula na Atlanta),
  • Women of African Descent Film Festival (Nan a pasa e pelíkula na Brooklyn)
  • The Long Island International Film Expo (Nan lo pasa e pelíkula na Long Island)
  • Miami Independent Film Festival
  • Direct Monthly Online Film Festival
    https://www.youtube.com/watch?v=olhOw_qSlxc&t=163s


The Probe
 (Supporting Actress)

– Tv Series Pilot dirigí dor di Derrick Hammond (un primu di Will Smith). Shelle su scene partner den e seri aki tabata Gary Sturgis ku a aktua den entre otro The Diary of a Mad black Woman i Daddy’s Little Girls.
https://www.youtube.com/watch?v=EnUMKSGF2Pc&t=67s

 

Bubbly Brown Sugar (Supporting Actress i production Manager)

– Un serie digital di 9 episodio  ku ta selekshon ofisial di Newark International  Film Festival na New Jersey i Hip Hop Film Festival na New York. Awor aki nos ta bezig ta wak kua plataforma digital lo ke pasa e serie òf si tin oportunidat pa pas’e na TV.
https://www.youtube.com/watch?v=HSVTsGWleeI&t=5s

 

– Shelly ta un di e produktornan, e production manager i Supporting Actress

 

The Defiled Bed 2 (Supporting Actress)

– Obra teatral

* 20 di Juli ’19: Peter Jay Sharp Theatre at Symphony Space, NYC, kapasidat 932 persona

* 7 di Desèmber ’19 Center Stage Theatre, Atlanta, Georgia,  kapasidat 1050 persona

 

Birthday Wish (Writer, Director & Lead Actress)

– Shòrt film den proseso di editing. Por haña a teaser riba Youtube dor di buska Birthday Wish Teaser. Nos ta spera di por tin e shòrt film kla na Juli 2019
https://www.youtube.com/watch?v=Lu8LJdFK0W0


Rachelle Le Blanc (Shelly)
Facebook page: Rachelle Le Blanc
Instagram: inspiringactress
IMDB: Rachelle Le Blanc

Continue Reading
Advertisement
You may also like...

More in Local

MVP Ad
To Top
How to whitelist website on AdBlocker?

How to whitelist website on AdBlocker?

  1. 1 Click on the AdBlock Plus icon on the top right corner of your browser
  2. 2 Click on "Enabled on this site" from the AdBlock Plus option
  3. 3 Refresh the page and start browsing the site
Close
error: Content is protected !!