Prome Minister Mike Eman ta continua “Accion di Bario” na Esso Heights

Diahuebs mainta Prome Minister Mike Eman a bishita e bario di Esso Heights como parti di e iniciativa Accion di Bario, un proyecto cu a cuminsa na 2009 bou di “Bo Bario” y cu awo ta continua bou di Gabinete AVP-Futuro.
Durante e bishita, Prome Minister Eman a drenta e bario hunto cu varios departamento y servicio publico manera Serlimar, Bureau City Inspector, DOW, FCCA, Polis di Bario y otro team profesional di su ministerio. Hunto nan a realisa accionnan concreto, incluyendo limpiesa di desperdicio grandi cu e habitantenan a prepara, manera frigidaire, stoof y muebles.
Accion di Bario ta enfoca riba dialogo directo cu e habitantenan, scucha nan preocupacionnan y tuma accion rapido pa mehora e calidad di bida den cada comunidad. E presencia activo di Prome Minister den e bario a crea un sentimento di balor, inspiracion y orguyo entre e habitantenan.

Durante e bishita, varios pensionado a expresa nan gratitud pa e aumento di pensioen, cu nan a ricibi y cu a alivia nan situacion dificil. Nan a indica cu e apoyo aki a trece mas trankilidad y confiansa, despues di añas sin ayudo comparable.
E iniciativa Accion di Bario ta contribui na fortifica confiansa, participacion y speransa den cada bario. Proyectonan manera “bishita den bario” ta enfatisa e Bon Comun: mas solidaridad, mas siguridad, espacio publico limpi y acceso respetuoso na servicio pa tur.
Cu cada Accion di Bario, Prome Minister Mike Eman ta reafirma su compromiso pa un comunidad mas uni, cu lideracion, participacion activo y un calidad di bida miho pa tur famia.
E bishita den Esso Heights a finalisa cu calor humano y brasa afectuoso.