Prome Minister Eman durante Accion di Bario: Plan di embeyecimento pa Lagoen

Durante Accion di Bario na Klip, Prome Minister Mike Eman a comparti mas detaye riba e vision pa revitalisa y embeyece e area di Lagoen, un espacio natural cu el a describi como “un tesoro” pa Aruba.
Segun Premier Eman, e Lagoen tin un balor special pa comunidad y p’e personalmente, pero mester mas atencion y mantencion. Durante actividad den bario, accion di limpiesa di e area ta como parti di un esfuerso conhunto cu habitantenan di bario.

E plan cu gobierno ta desaroyando ta inclui:
Instala un sistema di bombeo funcional pa permiti circulacion continuo di awa di lama.
Miho mantencion di mata y vegetacion rond di e lagoen.
Creacion di un caminda pa cana cerca di awa.

Desaroyo di un area recreativo pa famianan por disfruta y reuni.
“Nos kier trece bek e sentimiento di amistad y union den bario,” Prome Minister a expresa, enfatisando cu e obhetivo no ta solamente infrastructura, pero tambe fortalecemento di comunidad.
Si e proceso di aanbesteding ta move segun plan, e proyecto por cuminsa posiblemente na comienso di proximo aña. Gobierno ta aspira pa crea un espacio atractivo, limpi y sigur caminda famianan por reuni, combersa y comparti momento hunto.
E iniciativa ta forma parti di un vision mas amplio pa embeyecimento y revitalisacion di diferente bario nan di Aruba, fortaleciendo tanto medio ambiente como parti social di comunidad.