Durante e siman cu a pasa, e personal di Departamento di Aviacion Civil (DAC) a ricibi un training hopi importante for di Organisacion Internacional di Aviacion Civil (ICAO). Esaki a tuma lugar na Aruba mes door di dos instructor di ICAO.
E training ta specificamente pa e evaluacion y monitoreo di sistemanan di maneho di siguridad operacional (“SMS”). Tur organisacion cu ta activo den aviacion mester desaroya y implementa un programa di SMS y mester presenta esaki na DAC pa evaluacion. Pa medio di un sistema di SMS e compania por maneha su riesgonan a base di metanan concreto y predefini.
Un beneficio grandi di e programanan di SMS ta cu e ta suministra DAC cu informacion (“safety intelligence”), cual combina cu data di “safety reports” y inspeccionnan ta forma e base pa maneho di siguridad operacional aereo. Cu e monitoreo di data aki, DAC por identifica tendencianan y asina pasa pa un sistema predictivo pa maneha riesgonan den aviacion. Esaki ta un transicion cu ta tumando lugar den aviacion mundialmente.
E training a duna personal di DAC e “skillsnan” necesario pa evalua y monitorea e sistema di SMS. E training tabata hopi intensivo cu un duracion di 4 dia. E instructornan a elogia e grupo di profesionalnan pa nan conocemento, experiencia, participacion activo y aporte importante durante e curso.
Hopi di e actividadnan di DAC no ta den spotlight, pero ta di suma importancia y necesario pa segura e nivel di siguridad operacional. E personal tecnico di DAC, cual ta consisti di tanto beleidsmedewerkers como inspecteurnan, ta haci diferente actividad conhuntamente pa por garantisa siguridad operacional den aviacion. Pa por haci e trabounan aki, ta essencial pa e personal tecnico ta qualifica y bon entrena, den tur e areanan di aviacion. Solamente asina por garantisa un nivel di siguridad operacional aceptabel pa e biahero y tambe un nivel di cumplimento halto di ICAO. Un aviacion sigur, confiabel, solido y duradero ta di suma importancia pa Aruba su turismo y economia.
Un di e strategianan di ICAO cual DAC ta kere aden ta e promocion di profesionalnan femenino den e industria di aviacion. Pa cual motibo ta importante pa subraya cu e training aki a wordo duna door di dos instructor femenino y cu participacion di personal femenino. Actualmente DCA tin varios profesional femenino cu ta forma un parti integral di DAC y cu continuamente ta sigui desaroya nan mes den e industria di aviacion. Asina por mira cu recientemente un hurista femenino di DAC, sra. Marjanne Jarazagaray-da Silva a completa un postgrado den derecho aeronautico.
DAC kier a uza e oportunidad tambe pa informa tocante su portal pa raporta incidentenan. Tanto profesionalnan den aviacion y publico general por raporta anonimo riba cualkier situacion cu nan ta pensa por afecta siguridad di aviacion. E portal ta disponibel na e siguiente link: www.dca.aw/reporting.
Finalmente DAC ta gradici ICAO, Capacity Development and Implementation Bureau, pa suministra e training importante aki y DAC ta felicita su personal pa sigui y completa e training aki cu exito.
