“Tin porfin un luz na final di e tunnel”, asina ex minister Otmar Oduber a duna di conoce e siman aki na comunidad. Despues di a bay varios biaha corte y sali cu denuncianan di abuso cometi den e caso aki, porfin Diamars ultimo corte a informa señor Oduber cu e tratamento di e caso lo inicia dia 17 di November y ta ser spera cu pa dia 2 di December esaki lo yega na un fin. Na e momentonan aki ainda lo tin cu scucha algun testigo cu defensa di Oduber a pidi pa wordo scucha y esakinan lo tuma lugar den e siman di 26 di Augustus manera cu e reces di corte termina. Lo bira un siman sigur hopi interesante, paso pa prome biaha cu lo pone bao huramentacion dilanti di un huez comisario funcionarionan di Landsrecherche y RST di Hulanda y den a caso aki nan a wordo yama dilanti pa e defensa di Oduber mirando cu lo a keda constata cu e rapportnnan traha tawata completamente falso. “Mi lo a prefera claro pa e caso cuminsa mas prome, pero despues di ta wardando mas cu cuatro aña caba, e tres lunanan aki mi ta kere lo pasa lihe y asina mi por defende mi mes di e acusacionan sin base aki”, asina Oduber a declara den un comunicado ricibi.
DI OTRO BANDA HUEZ COMISARIO A NENGA E PETICION DI MINISTERIO PUBLICO.
Algun siman pasa señor Oduber a denuncia tambe e hecho cu Ministerio Publico lo a laga haci un peticion na Huez Comisario pa tene e indentidad di e polis Hulandes-Europeo di RST scondi, mientras no a pidi esaki pa esnan di KPA y Landsrecherche cu si ta Arubiano. Un acto cu e ex minister a considera un discriminacion y acto di sinberguensa di parti OM, paso ta netamente e personanan aki ta esnan cu mester bin splica pakico a traha raportnan falso y cu a conduci na henter e caso aki desde principio.
E ex mandarario a sigui bisa cu e ta convenci di cu e berdad lo sali na cla y cu e nightmare aki por pasa pa pasado y asina sigui cu su bida y di su famia cu metanan nobo pa futuro.
Source link
