Momento simbolico cu hisamento di bandera na Scol Mi Pret’i Wowo

24

Durante e iniciativa Accion di Bario, a haci un parada na Scol Mi Preti Wowo na Tanki Leendert, caminda a comparti un momento significativo cu docente, mucha y miembro di comunidad.
Segun Prome Minister Mike Eman, e bishita tambe a sirbi pa duna un empuhe adicional na e proyecto nacional di reforestacion, iniciativa cu gobierno ta impulsando pa stimula plantacion di mata nativo y promove un isla mas berde.
Durante e encuentro, e scol a comparti cu nan mes a cuminsa un hofi escolar, cu ta yama “Hofi Mi Pret’i Wowo”, un espacio educativo unda e muchanan por siña mas riba naturalesa y cuido di medio ambiente. Como señal di apoyo na e iniciativa aki, Prome Minister Eman a entrega un mata di shimarucu pa planta den e hofi di e scol.
Prome Minister Eman a expresa su satisfaccion cu e iniciativa di e scol, indicando cu institucionnan educativo ta hunga un papel fundamental den forma e generacionnan nobo.

Tambe a tuma lugar un momento significativo na Scol Mi Preti Wowo, caminda Prome Minister Mike Eman hunto cu representante di e scol, Sra. Koolman, a participa den hisamento simbolico di Bandera di Aruba, resaltando e importancia di inculca desde edad hoben, amor pa Aruba y respet pa su simbolonan nacional.
“Scolnan ta forma nos muchanan y ta implanta den nan curason e amor pa naturalesa y pa Aruba,” Eman a expresa.
E comunidad escolar tambe a comparti un momento caluroso cu wela Felicia Koolman, caminda a canta belated “Happy Birthday” den un ambiente alegre y familiar. E celebracion simbolico a wordo acompaña cu un bolo decora cu e bandera di Aruba, creando un momento special di union entre generacionnan.
E momento a tuma luga den marco di e celebracion nacional di 40 aña di Status Aparte y 50 aña di Himno y Bandera, resaltando con diferente generacion y institucion den comunidad ta sigui aporta na e desaroyo continuo di Aruba.
E iniciativa Accion di Bario ta sigui crea espacio pa contacto directo entre gobierno y comunidad, mientras cu tambe ta pone luz riba iniciativanan positivo cu ta contribui na bienestar social, cultural y ambiental di Aruba.