Ministerio Publico ta informa cu nan no ta divulga nunca nomber y potret di sospechoso

Riba 11 di februari 2025, Ministerio Publico a emiti un comunicado di prensa. E comunicado aki relaciona cu e caso di tiramento cu a tuma luga den marduga di diadomingo 9 di februari 2025, den cual A.C. Lanoy di 19 aña di edad a keda alcansa pa bala di polis. E no a sobrevivi e impacto aki.
Despues di e comunicado di prensa aki, a aparece un mensahe via un medio di comunicacion cu ta sugeri cu Ministerio Publico a divulga e datonan personal di e agentenan policial envolvi y tambe a suministra potret di nan.
Ministerio Publico no ta duna dato personal di sospechosonan. Ministerio Publico no ta confirma datonan personal di sospechosonan. Ministerio Publico no ta divulga potret di sospechosonan.
E mensahe menciona den medionan ta pues completamente contrario na e berdad.