Minister Geoffrey Wever ta introduci Koopkrachtmodel: Herment nobo di Gobierno pa midi impacto di maneho riba poder di compra

Gobierno di Aruba awo, oficialmente ta dispone di un modelo di poder di compra. Riba peticion di Minister Geoffrey Wever riba 13 di september, conseho di minister a formalisa e “koopkrachtmodel” aki como instrumento oficial di maneho. Lo uza e modelo di poder di compra aki pa haya un bista di con e maneho di Gobierno ta afect’e, y a base di e conocemento busca pa mitiga e posibel consecuencianan tambe.

E proceso pa traha e “koopkrachtmodel” a inicia desde januari ultimo unda cu Minister Geoffrey Wever a pone e fondonan necesario di su begroting pa traha e modelo aki. E mandatario a mira e necesidad pa agrega esaki na e hermentnan existente di bon gobernacion y awo, e departamentonan di gobierno lo mester tene cuenta tambe cu e posibel impacto di e maneho riba poder di compra.

Economisch Bureau Amsterdam a traha e “koopkrachtmodel” e aña aki y durante e proceso a duna un presentacion na Parlamento di Aruba, como tambe Conseho di ministernan y gremionan comercial. Pa loke ta trata maneho y ehecucion di e modelo di poder di compra, Departamento di Asuntonan Economico, Comercio y Industria lo ta encarga di esaki. Adicionalmente, e departamento lo ta encarga tambe cu e modelo macro-economico MARUBA pa asina garantisa e uzo di e modelo di poder di compra. Pa por eherce e trabao di maneha y mantene e modelo, Departamento di Asuntonan Economico, Comercio y Industria a ricibi e training necesario di Economisch Bureau Amsterdam.

Mirando e conexion directo entre desaroyo economico, poder di compra y pobresa, conseho di minister riba peticion di minister Geoffrey Wever a amplia e Comision MacroModel tambe cu participacion di Departamento di Asuntonan Social. E “Koopkrachtmodel” como instrumento di maneho lo contribui na mas transparancia ora di implementa maneho.

“Pa añanan largo Aruba no tabata tin un modelo pa mustra na un manera detaya kico e impacto di maneho ta riba e poder di compra di nos ciudadanonan. Awo como Pais si nos tin esaki. Uzo di e koopkrachtmodel lo yuda traha y ehecuta maneho cu ta tene cuenta cu of mitiga e efecto di maneho riba e poder di compra”, asina Minister Geoffrey Wever a splica.