Connect with us
MVP Ad

MARISOL LOPEZ-TROMP: UN ARUBA SIN REFINERIA LO HABRI CAMINDA PA HOPI OPORTUNIDAD NOBO PA ARUBA

Caribean

MARISOL LOPEZ-TROMP: UN ARUBA SIN REFINERIA LO HABRI CAMINDA PA HOPI OPORTUNIDAD NOBO PA ARUBA

MARISOL LOPEZ-TROMP: UN ARUBA SIN REFINERIA LO HABRI CAMINDA PA HOPI OPORTUNIDAD NOBO PA ARUBA

MARISOL LOPEZ-TROMP: UN ARUBA SIN REFINERIA LO HABRI CAMINDA PA HOPI OPORTUNIDAD NOBO PA ARUBA  – ORANJESTAD, – Na september 2016 den Parlamento a vota pa refineria, unda e resultado tabata 20 na fabor y 1 contra. E 1 contra tabata e voto di Marisol Lopez-Tromp.

E tempo ey, e tabata Presidente di Parlamento y maneho di e Gobierno tabata uno ‘green’, uno sostenibel, es decir, uno den cual nunca lo por a spera cu lo a anuncia un reapertura di un refineria.

Ademas, tur hende por corda con e deal aki tabata dudoso y no tabatin transparencia ora cu el a yega Parlamento. Ni e documentonan cu Parlamentarionan a pidi pa wak ex Minister Mike de Meza kier a entrega na Parlamento.

Tin cartanan cu Marisol Lopez-Tromp a manda (juli 2016) pidiendo nan pa entrega tur cos cu nan tin na Parlamento, esaki mirando cu nan a anuncia publicamente cu nan a sera deal y Parlamento no tabata sa di nada.

Contesta di e tempo ey Minister Mike de Meza tabata cu e no ta haya oportuno ainda pa entrega e documentonan na Parlamento considerando cu ainda nan tabata den un proceso di negociacion y mester a warda te ora esey caba, pasobra si entrega nan na Parlamento e lo por a perhudica e negociacionnan.

Contrario n’e ponencia aki, pa Lopez-Tromp, ora sera un acuerdo di e envergadura ey, Parlamento mester sa adelanta kico e ta encera.

E lider di fraccion di POR ta remarca un biaha mas cu el a vota contra, pasobra e ta considera cu e deal aki no tabata transparente, Parlamentarionan a haya solamente un par di ora pa sinta den biblioteca di Parlamento pa pasa riba e documentonan cu tabata consisti di 2 mil pagina.

Ademas por corda e situacion di Venezuela cu no tabata bon y tabata empeorando. Banda di esey, varios di esnan cu tabata envolvi cu e proyecto awendia ta sera.

Tambe Marisol ta bisa cu refineria tabatin su bon temponan na Aruba, el a snifica hopi pa nos isla, pero nos ta den un tempo cu nos tin cu wak nos dilanti riba kico otro por bin cune na Aruba, considerando e tamaño y medio ambiente di nos isla y salud di nos hendenan.

E tempo ey ex Minister di Salud, dr. Alex Schwengle, ora Marisol Lopez-Tromp a haci’e e pregunta riba efecto di salud, no solamente como Minister, pero tambe dokter di pulmon, el a bisa cu e refineria tin efecto negativo riba salud.

Pero mayoria den Parlamento e tempo ey a kere cu esaki lo por trece trabou pa hopi hende y a firma un mocion (20 di nan) bisando cu e reapertura di e refineria lo trece un cantidad considerable di cupo di trabou, cual sigur ta importante, pasobra kier stimula economia.

Pesey nan a duna prioridad n’e parti laboral y a sostene e deal, apesar cu no a haya tur e documentonan pa wak manera cu mester ta.

Mirando awe, 3 aña despues di e votacion, e placa cu e refineria lo mester a trece aden pa sera e buraco den presupuesto, nunca a drenta, pasobra nunca e refineria a habri y “laga nos papia straight, e no ta bay habri tampoco”, Lopez-Tromp ta bisa y ta agrega cu n’e momentonan aki Aruba ta rehen di un contrato caminda cu con cu bay bin nos tin un Gobierno responsabel pa cu e situacion akinan y kier minimalisa e daño pa Aruba y ta considera cu ainda tin trahadornan eynan.

Di otro banda el a bisa cu Prome Minister a anuncia cu el a haya sa na Merca cu nunca tabatin intencion pa habri e refineria, es decir, cu Citgo nunca a pidi licencia n’e Office of Foreign Assets Control pa rehabilita e refineria, al contrario, nan a pidi’e pa ‘unwind’, pa no tine mas.

“Esaki ta algo sumamente importante pa tene cuenta cune pa mustra cu no tabatin of tin intencion pa reapertura.

Ademas den e contract tin poni cu si aproba e ley akinan, si bay di acuerdo cu tur loke tin scirbi eyden, esey kiermen tambe cu ta aproba tur e acuerdonan y tur e negociacionnan cu Gobierno di e tempo ey ta haci den nomber di Parlamento y pueblo.

Na momento cu mi a lesa esaki y mirando e comportacion e tempo ey di e ex Minister, naturalmente, mi firma bo no lo haya eybou., ademas cu e ta malo pa nos salud, malo pa medio ambiente y ta tempo pa Aruba tin otro desaroyo pariba di brug na San Nicolas y cu ta trece otro tipo di infrastructura pa Aruba”, Marisol Lopez-Tromp a duna di conoce.

El a bisa tambe cu no ta un secreto cu Minister Otmar Oduber n’e momentonan aki ta bezig cu un hotel pariba, un desaroyo pa San Nicolas y si e continua e lo trece otro tipo di infrastructura, lo tin embeyecimento, mas seguridad, mas hende ta bay biba y traha eynan. Es decir, e lo ta algo completamente otro cu un reapertura di un refineria.

N’e momentonan aki Parlamentario di POR no ta wak apertura di e refineria, e no a wake 3 aña pasa tampoco y mas bien a wake como e forma pa wanta e rosea te eleccion pa bisa cu e lo trece placa aden cu lo a tapa e buraco den presupuesto y a priminti miles di hende trabou unda cu no solamente un cantidad di hende a bin Aruba bek pensando cu nan lo haya trabou, pero tambe otronan a rechasa ofertanan pa keda en espera di e refineria na nos isla.

Prome Minister a anuncia cu ta lantando un comision pa mira e 3 posibel camindanan pa cu e refineria. E prome ta reapertura di e refineria cu Citgo, cual n’e momentonan aki ta pinta scur. E di dos t’e reapertura di e refineria no cu Citgo y e di tres ta cu no ta bay dor mas cu refineria y ta wak otro posibilidadnan di desaroyo pa Aruba.

Finalisando, Marisol Lopez-Tromp a expresa cu e ta prefera e ultimo posibilidad unda cu mester busca un desaroyo nobo no solamente pa 2 of 3 aña sino p’e siguiente decadanan pa nos pais.

“Un ARUBA sin refineria. Esaki lo habri caminda pa hopi oportunidad nobo. Bo yiu y nieto lo gradicibo pe desicion aki”.

Continue Reading
Advertisement
You may also like...

More in Caribean

MVP Ad
To Top
How to whitelist website on AdBlocker?

How to whitelist website on AdBlocker?

  1. 1 Click on the AdBlock Plus icon on the top right corner of your browser
  2. 2 Click on "Enabled on this site" from the AdBlock Plus option
  3. 3 Refresh the page and start browsing the site
Close
error: Content is protected !!