Despues cu Pandemia a asota nos pais, aña 2023 tabata oficialmente e prome aña cu nos pais a recupera 100% financieramente y por a produci un surplus, cual a sirbi pa paga 153 miyon florin riba nos debe nacional. Aña 2024 tambe nos economia ta creciendo, nos posicion financiero ta mehorando dia tras dia. Si tur cos sigui crece manera ta pronostica nos lo tin un surplus riba nos presupuesto di cual 129 miyon florin por wordo usa pa paga riba nos debe, y un total di 33 miyon florin lo bay pa yuda diferente grupo vulnerabel den nos pueblo cu aumento di bijstand, indexering, reparatie toeslag, bahamento di prima di AZV pa pensionadonan y mas. Caft, Aruba su supervision financiero oficial a declara cu nos debe nacional ta na 79% di nos GDP cu ta un adelanto enorme, ya cu durante pandemia e tabata na 122% di nos GDP. Esaki ta danki na crecemento economico record y crecemento di nos GDP.
Banco central ta saca su “State of the Economy” di e prome kwartaal di 2024
Riba 15 di Augustus Banco Central di Aruba ta pone den su rapport cu den e prome kwartaal di 2024, e economia di Aruba a crece cu 11,2% compara cu e mesun periodo di 2023. Turismo a keda e contribuyente principal na e crecemento economico y a registra aumento significante den gasto di turista. Ademas, e continuacion di proyectonan di construccion relativamente grandi a hisa inversion mientras consumo eleva tambe a duna un impulso na economia Arubano. E cantidad total di bishitantenan cu ta permanece por lo menos un anochi riba nos isla a crece cu 22,5% te cu maart 2024 compara cu e mesun periodo di e aña prome. Mientrastanto, e cantidad dianochi cu e bishitantenan a keda a crece cu 16,0%. Entrada di actividadnan turistico registra na e banconan comercial a aumenta cu 11,5% compara cu e prome kwartaal di e aña anterior.
Banco Central; Inflacion a baha fuertemente den prome kwartaal.
Na maart 2024, e tasa di inflacion midi riba un promedio anual a sigui baha y yega 2,1%,
reflehando un caida di 1,3 punto di porcentahe compara cu december 2023. E inflacion riba un promedio anual na Aruba ta bahando desde mei 2023, principalmente reflehando e caida den e contribucion di e subida den tarifa pa utilidad den Augustus 2022, prijsnan di gasolin y diesel mas abou, y normalisacion den prijsnan pa cuminda. Ademas, inflacion riba un promedio anual – kitando e efecto di cuminda y energia – a contribui menos na e inflacion midi riba un promedio anual, mas tanto door di costo mas abou pa compra di vehiculonan.
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!
Follow the story