Indice di Prijs di Consumo (CPI) pa luna di October 2024

E CPI pa luna di October 2024 ta 109.19, loke ta representa un caida di 0.4% compara cu e indice di September 2024 (109.58). E cambio di e CPI pa e ultimo diesdos (12) lunanan (October 2023 te cu October 2024) ta 1.0%, un caida di 0.7 punto di porcentahe
(ppt) compara cu e periodo corespondiente di aña pasa (1.7%). E promedio anual (ultimo 24 luna) di e tasa di inflacion pa e periodonan di October 2021 te cu October 2022 y October 2023 te cu October 2024 ta 2.0%, un caida di 2.1 ppt compara cu e 4.1% registra den e periodonan di October 2020 te cu October 2021 y October 2022 te cu October 2023.

Durante e luna aki, seis (6) di e diesdos (12) sectornan a registra caida di prijs. E caidanan cu tawata tin e mayor efecto riba e CPI a wordo registra pa e sectornan di “Transporte” (-2.4%) y “Vivienda” (-0.3%), causando un efecto di respectivamente, -0.32 y -0.08 ppt. E caidanan den e sectornan restante a contribui cu un efecto di -0.06 ppt riba e CPI di October 2024.
E caidanan aki a wordo contraresta parcialmente door di principalmente un subida den e indice di e sector di “Paña y sapato” (2.2%) cu a contribui cu un efecto di 0.05 ppt riba e CPI di October 2024. E subidanan den e sectornan restante a contribui cu un efecto di 0.05 ppt riba e CPI di October 2024.
E caida den e sector di “Transporte” a wordo causa principalmente door di un caida di 3.8% den e categoria “Gasto relaciona cu uso di vehiculo di transporte personal”, causando un efecto di -0.31 ppt. E caida den e sector di “Vivienda” a wordo causa door di un caida di 1.5% den e categoria “Mantencion y reparacion di vivienda”, causando un efecto di -0.09 ppt.
E subida den e sector di “Paña y sapato” a wordo causa door di un subida den e categoria “Paña” (2.9%), causando un efecto di 0.05 ppt.

Canasta di consumo
E canasta di consumo di e CPI ta consisti di 408 bienes y servicionan. Compara cu September 2024, 41.4% di e bienes y servicionan aki a conoce un aumento di prijs causando un efecto di 0.50 ppt, mientras cu 38.2% ta mustra un caida di prijs, cu a contribui cu un efecto di -0.86 ppt y pa e restante 20.3% no tawata tin cambio den prijs. Prijsnan di bienes a baha cu 0.6% y a causa un efecto di -0.35 ppt. Prijsnan di servicionan practicamente no a cambia compara cu September 2024 y a causa un efecto insignificante riba e CPI di October 2024.