52
HOH Academy ta pone un paso historico den e conexion entre enseñansa y mercado laboral. Cu hopi orguyo, Plataforma Educacion & Labor (PEL) ta felicita dos profesional di HOH Academy cu a logra obtene nan certificado Train the Trainer: Sra. Monique Leerdam, Docente Cordinador & Clinical Teacher, y Sra. Jessica Daamen, Senior IC Verpleegkundige & Clinical Teacher i.o. na Dr. Horacio Oduber Hospitaal.
Despues di a completa e sesion Train the Trainer, organisa y certifica pa PEL, nan ta oficialmente autorisa pa duna e curso di BPV-opleider. Asina e dos profesionalnan por forma nan propio coleganan den hospital, pero tambe profesionalnan den sector di cuido di salud y otro sectornan. Cu e logro aki, HOH ta e prome compania di pasantia na Aruba cu, como partner activo di PEL, ta tuma un paso importante pa fortalece structuralmente e colaboracion entre enseñansa y mercado laboral.
PEL ta guia companianan den e proceso pa bira un asina yama Erkend Leerbedrijf y ta apoya den e profesionalisacion di BPV-opleiders. Pa medio di entrenamiento, reglanan di calidad y colaboracion estrecho cu scol- y empleadonan, PEL ta traha na:
• Fortalecimento di pasantia (BPV)
• Mihor conexion entre estudio y trabou
• Capacidad duradero di empleadonan
• Profesionalisacion di companianan di pasantia
• Desaroyo economico di Aruba
Organisacionnan cu nan empleado a completa e curso di BPV-opleider y tuma nan reconocimiento como un erkend leerbedrijf ta beneficia di:
• Guia profesional y structura pa stagiare
• Fortalecimento di calidad interno y transferencia di conosemento
• Colaboracion mas fuerte cu skolnan
• Imagen fuerte y socialmente comprometido
• Contribucion directo na desaroyo di talento local
Sra. Monique Leerdam y Sra. Jessica Daamen ta mustra con profesionalnan di mercado laboral por hunga un rol clave den desaroyo di talento. Nan dedicacion, experencia y motivacion ta hasi un diferencia real pa studiante, coleganan y e futuro di cuido di salud na Aruba.
PEL ta felicita nan cu hopi orguyo y ta expresa aprecio tambe pa HOH Academy como pionero den e desaroyo aki. Otro organizacionnan ta invitá pa sigui e bon ehempel aki y inscribi pa e curso di BPV-Opleider. Hunto, HOH Academy y PEL ta construi un ambiente di pasantia fuerte, unda enseñansa y mercado laboral ta bai man den man pa futuro di Aruba.
Pa mas informacion tocante PEL y e curso: 5283433, infopel.aw of www.ea.aw
Follow the story