Amigonan, mientras nos ta acercando na e dia crucial di 6 di december, mi kier dirigi un mensahe di gratitud, speransa, y compromiso na cada hende riba nos dushi isla. E isla cu a mira mi crece y a duna mi oportunidad di madura, expresa y hasta cu awe mi ta na e lugar di por duna bek.
Pa loke ta mi campaña, mi lo keda semper hopi agradecido pa e energia, amor, y sosten cu boso a mustra mi durante e trayectoria aki. Mi ta contento di por a encontra portanan habri den e campaña aki y topa cu bosonan y intercambia cu tanto hende cu tin e pasion y speransa pa un miho mañan. E esfuerso di cada boluntario, simpatisante, y ciudadano ta un refleho di e forsa cu nos pueblo tin y tambe ta ilustra cuanto nos por ora nos bini hunto.
Hendrik Tevreden, #6 riba lista di MEP, no ta djis un nomber mas: e ta sinonimo di un compromiso na un Aruba mas fuerte, mas husto, y mas sostenibel. Mi ta kere cu progreso real ta bini si nos pueblo ta uni den un solo mision: di sigui construi un pais cu a y lo sigui pone e bienestar di su hendenan na prome lugar. E ta un compromiso cu famianan, enseñansa, y mihor salud; un compromiso cu oportunidad nobo pa nos hobennan, proteccion pa nos grandinan, y sosten pa tur sector economico y social.
Eleccion no ta solamente un oportunidad pa scoge un lider. E ta un oportunidad pa scoge un direccion, pa determina ki tipo di Aruba nos kier sigui construi y ki tipo di Aruba nos lo laga pa mañan. P’esey bo voto ta un acto poderoso. E ta bo bos den e proceso di establece un mañan cu ta beneficia cada miembro di nos comunidad. Nos no por perde e oportunidad pa stima y proteha nos patria p’esey nos tin di sali y vota.
Cu un curason gradicido, humildemente mi ta pidi boso e confiansa. Mi ta pidi bo sosten. Mi ta pidi cu, riba dia di eleccion, boso laga e ambicion pa un mihor mañan guia boso decision. Hunto, nos por logra e siguiente nivel di progreso. Un avanse cu ta basa riba union y trabou duro pa nos Pais. Mi ta kere cu cada Arubiano merece un bida digno y un pais cu ta sigui brinda oportunidad na tur.
Mi compromiso ta cla: sigui esforsa pa e pueblo, sigui defende e interesnan di nos Pais, y traha dia y nochi pa un gobierno eficiente, honesto y capaz. Mi tambe ta kere den e forsa di nos pueblo. Hunto, nos por supera cualkier desafio y logra e Aruba cu nos tur merece.
E siman aki di eleccion, dal un paso decisivo pa un futuro yena di speransa, progreso y stabilidad. Uni na e vision, esfuerso, y liderazgo di progreso. Uni na e movecion di Movimiento Electoral di Pueblo. Riba 6 di december vota #6 riba lista di MEP.
Danki pa bo confiansa y sosten. Mi ta conta riba bo, y sa cu bo por conta riba mi!
