E noticia y e preocupacion mas grandi den e dianan aki ta e situacion di accidentenan cu tin y principalmente esnan cu e famoso frase “hit and run” cu a para bira un custumber y un cos di tur dia. Un situacion cu sigur tin hopi hende preocupa y ya caba por a sinti y mira riba rednan social con preocupa comunidad ta pa cu esaki y gritonan a cuminsa lanta cu: “ ami no ta sali for di cas mes mas pasobra bon sa unda y ki ora un chauffeur burachi por bin dal den bo y desgracia bo bida pabo”.
Gritonan cu mester tene sigur na cuenta cune pasobra ta henter un comunidad esakinan ta afecta. Hasta awe mainta Minister di Husticia Arthur Dowers a wordo yama dor di Parlamento p’asina e por duna su “opinion” of hasta kisas un aliento di alivio pa comunidad por sinti su mes safe bek riba careteranan di Aruba. Pero nos a compronde cu minister no a presenta ningun plan concreto pero si a mustra di ta trahando riba algo ey cu lo mester bira algo concreto.
Pero sigur den nos opinion ningun hende tin e solucion pa e situacion aki cu ultimo añanan a sali completamente for di man debi na diferente factor cu aunke pa otronan ta mustra insignificativo, toch esakinan ta haci un influencia grandi riba henter e situacion cu nos tur ta pasando aden aworaki. Primordialmente e hecho di core bao di influencia di alcohol y otro substancianan ta e causa principal pero tambe e simple hecho cu NINGUN HENDE TA MUSTRA RESPONSABILIDAD PA NAN ACTONAN.
Pa duna un ehempel kizas un tiki bruto pero cu lo por splica mas cla na kico nos ta referi ta e hecho cu na momento cu bo tene relacion sexual cu un hende muher, den e caso aki un hende homber, kico ta e consecuencia???? Wel cu e hende muher lo sali na estado pasobra manera den basis school nan ta sinjabo, een en een ta twee!!!!
Dus bo mester atene bo mes na e consecuencianan di bo actonan awo por bisa no mi ta hacie pero mi te cuida mi mes usando pilder of hasta condom, pero esey no ta nifica cu bo ta 100 porciento sigur cu algo lo no resulta di bo actonan. Dus kico ta e siguiente stap??? Masha facil mes atene bo mes na e consecuencianan y punto. Tanten cu nos como ser humano no atene nos mes na e consecuencianan di nos actonan, e cosnan aki lo sigui sosode pasobra mira un ehempel e droga cu mas hende ta mata ta alcohol y nos tin decada ta haciendo algo contra esaki pero nos no ta logrando pasobra cosnan ta sigui pasa.
Por hasta bisa y hisa e castigo pero hisando e castigo en realidad lo caba of mengua e situacion of ta djis “spanta” e chofernan pa un periodo y despues toch e free for all ta sigui. Dus kico nos mes haci, atrobe atene nos mes na e consecuencianan di nos actonan as simple as that. Pasobra e hende a bira asina “ sin gevoel” pa cu otro hende pero pa cierto cosnan si nan tin tur sorto di comprension pero pa e ser humano “nadita de nada”. Nos no tin compasion pa cu e cosnan cu realmente ta importante riba e mundo aki.
A para bira cu simplemente nos no ta scucha mas y nos ta kere cu ta ami ta manda akinan y mi por haci loke me da la gana. Hobennan awendia simplemente no ta sigui ordo di polis mas y mas ainda nan no ta ni sigui ordo di nan mayornan cu tin mas experiencia di bida cu nan y practicamente ta pensa cu ora nan a nace e mundo aki a cuminsa. Ruman e mundo aki tin hopi decada caba ta existi ta abo a bini aworaki y tur caminda tin regla cu mester cumpli cune. Semper nos kier pidi un chens, nos kier take chens y den esaki e ta bira custumber y cos ta sali totalmente for di man manera e ta actualmente. Cu tin cosnan pa drecha pa loke ta e sistema hudicial ta berdad pero ban nos tur hunto pone nos granito de arena pa logra esaki.
Pero no, nos ta prefera di haci loke nos kier y kico ta pasa, un famia ta keda den tristeza, un persona ta perde un parti di si curpa y abo mes ta tira henter bo bida afo y sin papia mes di e tristeza cu bo acto ta causa serca bo famia y e resto di comunidad. Shonnan ban ta mas responsabel pasobra esaki ta loke nos falta riba e pais aki para responsabel pa nos actonan y no busca the easy way out pa scapa pasobra manera e dicho ta bisa “bo hunga cu candela e ta bay kimabo”. Si bo sa esey pakico bo ta hacie toch????
Incomprendibel na cierto momento y ora cosnan pasa nos kier pidi sorry y busca tur manera pa core of salba di e responsabilidad cu nos tin como persona cuidadano di e pais aki ora nos ta tras di stuur y no solamente tras di stuur sino den tur cos cu nos haci riba e mundo aki. Tin tur sorto di campaña pa no bebe y stuur pero e cosnan aki ta sigui pasa toch dus algo ta robez y e algo robez ey ta serca nos mes como ser humano nos tin cu busk’e pasobra ta nos fout, no di e auto ni di e alcohol.
