Fundacion Zinnia ta lansa un encuesta pa midi impacto di campaña “Supla pa Bida”

20

Fundacion Zinnia a lansa un encuesta pa midi e impacto di su campaña “Supla pa Bida”, un iniciativa cu ta parti di e movemento Amigo DiDi, cu tin como meta principal promove decision responsabel y preveni maneha bou di influencia na Aruba.
Despues di varios actividad exitoso durante e 3 lunanan di e campaña, unda comunidad a reacciona na un forma hopi positivo, Fundacion Zinnia ta bay un paso mas leu, pa evalua con e mensahe y e accionnan a impacta conscientisacion, actitud y comportacion di e publico.

E encuesta, cu ta dura solamente 2 pa 3 minuut, ta enfoca riba diferente aspecto importante, manera nivel di conocemento di e campaña, si e mensahe a influencia e decisionnan tocante consumo di alcohol y maneha auto y tambe con e comunidad ta percibi e uzo di breathalyzer como un instrumento preventivo.
Pa Fundacion Zinnia, e informacion cu nos logra colecta lo yuda fortalece e campaña y traha riba un modelo mas sostenibel pa futuro. Na final tambe lo comparti e resultadonan cu e stakeholdernan importante, incluyendo New India Assurance, Korps Politie Aruba (KPA), Botica di Servicio y pueblo di Aruba, cu tur ta hunga un rol clave den e iniciativa aki.
“Supla pa Bida” no ta solamente un campaña di conscientisacion, sino un movemento pa crea un cultura, unda celebracion y responsabilidad ta bay hunto. Cu e encuesta aki, Fundacion Zinnia ta invita comunidad pa haci nan bos conta y contribui na un Aruba mas safe.
Fundacion Zinnia ta invita y encurasha tur hende pa participa den e encuesta via e link of QR code comparti riba nan pagina di Facebook y duna bo opinion, cu sigur ta sumamente importante.