Estadistica di CBS ta indica cu costo di bida a subi: Salario pa famia den cas mester ta mas halto

0

E CPI pa luna di februari 2026 ta 109.89, loke ta representa un subida di 0.6% compara cu e indice di Januari 2026 (109.19). E cambio di e CPI pa e ultimo diesdos (12) lunanan (februari 2025 te cu februari 2026) ta 0.7%, un subida di 0.2 punto di porcentahe (ppt) compara cu e periodo corespondiente di aña pasa (0.5%).
E promedio anual (ultimo 24 luna) di e tasa di inflacion pa e periodonan di februari 2024 te cu februari 2025 y februari 2025 te cu februari 2026 ta 0.1%, un caida di 1.5 ppt compara cu e 1.6% registra den e periodonan di februari 2023 te cu februari 2024 y februari 2024 te cu februari 2025.

Subida den prijs y caida den sector di vivienda
Durante e luna aki, dies (10) di e diesdos (12) sectornan a registra subida di prijs. E subidanan cu tawata tin e mayor efecto riba e CPI a wordo registra pa e sectornan di “Recreacion y cultura” (2.9%), “Mobilario” (1.6%), “Transporte” (0.8%), “Comunicacion” (0.6%) y “Cuminda y bebida no-alcoholico” (0.4%), causando un efecto di respectivamente, 0.25, 0.14, 0.10, 0.05 y 0.05 ppt. E subidanan den e sectornan restante a contribui cu un efecto di 0.05 ppt riba e CPI di februari 2026. E unico caida a wordo registra den e indice di e sector di “Vivienda” (-0.01%) y a contribui cu un efecto insignificante riba e CPI di februari 2026.

Subida den recreacion y cultura debi na vacacion
E subida den e sector di “Recreacion y cultura” a wordo causa principalmente door di un subida di 15.3% den e categoria “Vacacion”, causando un efecto di 0.29 ppt.

Subida den mobilario y aparato domestico
E subida den e sector di “Mobilario” a wordo causa principalmente door di subida den e categorianan “Aparato pa uso domestico” (3.4%) y “Herment y ekipo pa cas y hardin” (8.5%), causando un efecto di respectivamente, 0.08 y 0.07 ppt.

Subida den transporte debi na gasto di vehiculo personal
E subida den e sector di “Transporte” a wordo causa door di subidanan di 14.0% y 0.8% den e categorianan “Servicio di transporte” y “Gasto relaciona cu uso di vehiculo di transporte personal”, causando cada uno un efecto di 0.06 ppt.

Subida den comunicacion
E subida den e sector di “Comunicacion” a wordo causa door di un subida den e categoria “Ekipo di telefon y fax” (10.1%), causando un efecto di 0.05 ppt.

Subida den cuminda y bebida
E subida den e sector di “Cuminda y bebida no-alcoholico” a wordo causa door di subidanan di 1.5% y 0.2% den e categorianan “Bebida no alcoholico” y “Cuminda”, causando cada uno un efecto di 0.02 ppt.

Canasta di consumo a conoce aumento
E canasta di consumo di e CPI ta consisti di 408 bienes y servicionan. Compara cu Januari 2026, 54.7% di e bienes y servicionan aki a conoce un aumento di prijs causando un efecto di 0.98 ppt, mientras cu 30.6% ta mustra un caida di prijs, cu a contribui cu un efecto di -0.35 ppt y pa e restante 14.7% no tawata tin cambio den prijs. Compara cu Januari 2026 prijsnan di bienes (0.5%) y servicionan (0.8%) a conoce subida y a causa un efecto di respectivamente, 0.29 y 0.34 ppt riba e CPI di februari 2026.

Bestaansminimum salario pa un famia
E bestaansminimum pa un hogar consistiendo di dos (2) adulto y dos (2) mucha (edad 0-14) na februari 2026 ta Afl. 5,551, un subida di Afl. 22 compara cu Januari 2026 (Afl. 5,529). E bestaansminimum pa un hogar di un (1) adulto ta Afl. 2,643, un subida di Afl. 10 compara cu Januari 2026 (Afl. 2,633).

Kico ta un “Bestaansminimum” y con e ta wordo ahusta?
CBS ta defini un bestaansminimum como e nivel minimo di entrada cu ta wordo percibi necesario pa un persona of famia por funciona den sociedad di un manera adecuado y socialmente aceptabel. Ora nos usa e definicion “Bestaansminimum”, en realidad ta wordo referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta wordo considera necesario pa biba un bida liber di privacionnan basico” (Nacionnan Uni). Un indice a wordo crea pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna. Cada luna e indice aki ta wordo ahusta, a base di e prijsnan di alimento, paña, vivienda, transporte y otro articulonan den e canasta.
E bestaansminimum actual ta wordo basa riba e rapport “Bestaansminimum 2010” publica door di CBS na December 2010, y cual ta wordo actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (edad 0-14). E peso total pa un hogar asina ta 2.1 (1.0+0.5+0.3+0.3).