HOOFDSTEMBUREAU
ARUBA
Anuncio
Conforme articulo 16 inciso 4 di e Ordenansa Electoral, e Presidente di Hoofdstembureau ta participa lo siguiente:
Entregamento di lista pa e partidonan politico lo tuma lugar diabierna 18 october 2024.
Segun articulo 16 inciso 2 di e Ordenansa Electoral por haci esaki den dos manera:
Den forma digital of
Personalmente
Informacion general
E entregamento di e lista di candidato (kandidatenlijst) lo mester sosode entre 09:00 or cu 16:00 or.
E formularionan cu mester wordo yena y entrega dia di entrega di lista lo ta disponibel di antemano riba e website er.aw
Tambe ta pidi pa yena e declaracion di escogencia di color (si e partido ta desea esey) si acaso esaki lo wordo usa riba e stembiljet. Conforme articulo 30 inciso 2 di e Ordenansa Electoral e colornan lo wordo publica mas tarda 4 di october 2024.
Entregamento den forma digital:
E apoderado (suplente) di e partido politico mester manda e lista di candidato diabierna 18 october entre 09:00 or cu 16:00 or na e e-mail [email protected].
Conforme articulo 19 inciso 3 jo. articulo 20 di e Ordenansa Electoral, mester entrega e siguiente informacion por escrito na Hoofdstembureau dentro di 24 ora cu a haci e entrega di lista digitalmente:
Declaracion individual di cada candidato cu nan ta bai di acuerdo cu ponemento di nan nomber ariba lista di candidato;
Comprobante di pago na Departamento di Finansas di un suma di Afl. 1.000,-;
Un pasfoto blanco cu preto di 4 pa 6 cm, dunando un bista claro y igual di e candidato postula mas halto ariba e lista di e partido.
Den e caso aki articulo 132 di e Ordenansa Electoral ta aplicabel.
Pa entrega personal:
Pa entrega personal, tiramento di lot lo determina e orario cu cada partido politico lo entrega nan lista. Esaki lo tuma lugar dia 11 october 2024 pa 10 or na Schoolstraat 2, Hotel California. E apoderado (suplente) of lider di partido por ta presente pa cu esaki.
Diabierna 18 di october 2024 e apoderado (suplente) di e partido politico ta haci entrega di e lista di candidato riba e orario cu a wordo stipula. Un candidato of lider di partido tambe por ta presente durante e entrega aki. E entrega lo tuma lugar na Schoolstraat 2, Hotel California.
Conforme articulo 19 jo. articulo 20 di e Ordenansa Electoral hunto cu e lista mester entrega, lo siguiente:
Declaracion individual di cada candidato cu nan ta bai di acuerdo cu ponemento di nan nomber ariba lista di candidato;
Comprobante di pago na Departamento di Finansas di un suma di Afl. 1.000,-;
Un pasfoto blanco cu preto di 4 pa 6 cm, dunando un bista claro y igual di e candidato postula mas halto ariba e lista di e partido.
Ademas di e anuncio aki, e apoderado di cada partido politico, kende ta conoci na Hoofdstembureau cu lo participa na e eleccion 2024, lo ricibi un carta di Hoofdstembureau den cual lo menciona detayadamente locual a wordo describi den e anuncio aki.
