Diabierna. 1 di november 2024, di 5.30 pa 8.00 lo tin presentacion di dos obra literario na Biblioteca Nacional Aruba, George Madurostraat, Oranjestad.
Biblioteca Nacional Aruba, hunto cu Departamento di Cultura Aruba y Mirto Laclé a uni pa organisa un encuentro literario cu autornan nacional y internacional.
Di Aruba Ariana Koolman-Chirino lo presenta su buki titula ‘E flor tristo’, un cuenta cu un mensahe a-temporal y universal. Un buki dedica tanto na mucha como na hende grandi.
Ariana ta conoci pa su cuentanan cortico, pero tambe particularmente conoci pa su poemanan. El a publica e buki di poema titula ‘Mi bahul di poema’ cu a resalta cu poemanan cu ta contene bunita mensahe.
E buki ‘E flor tristo’ ta trata di naturaleza. Un relato di e bida di matanan di Aruba bou solo cayente cu tiki awasero, of nada di awa, ya cu no tin yobida. E flor Magdalena, e personahe principal di e cuenta ta sinti su mes desespera y cu temor pa su bida, debi na scarsedad di awa. Inespera e ta haya un ‘shock’ ya cu su habitad ta na peliger.
Ariana tin 37 aña den organisacion di Scouting Aruba y 31 aña trahando na CMB NV.
Maria Karg ta e di dos presentado, un invitado for di Hulanda. Maria Karg lo presenta su obra literario ‘Stil verleden, de ontdekking van mijn slavernijgeschiedenis’. Maria Karg a nace y crece na Surnam. El a bay Hulanda pa studia y a keda biba na Hulanda. El a regresa Surnam pa bishita su tata cu ta sufri di un quebrante di salud y poco despues ta fayece. Den e cas casi bashi di su tata, Maria ta bin topa cu un caha yen di corant, mapa, algun carta y buki.
Drs. Maria Karg a studia antropologia y ta eherce e profesion di docente, a traha na NINSEE (Instituto Nacional Neerlandes di Pasado di Sclabitud y Herencia). Tambe Maria ta fundado di Stichting Stil Verleden, cu desde 2014 ta suministra informacion encuanto e pasado di sclabitud Neerlandes.
Como sifuera e ta arma un puzzel, Maria ta siña conoce kendenan ta su antepasadonan y con e pasado di sclabitud ta entrelasa cu su propio historia familiar. E ta describi lugarnan historico na Surnam cu ta importante pa e por compronde su realidad di bida a traves di e herencia di su antepasadonan. Den e obra ‘Stil Verleden, …’ Maria Karg ta hiba e lesado na su biahe di descubrimento …
Publico en general ta invita pa bin celebra hunto cu Biblioteca Nacional Aruba. Entrada ta gratis. Pa mas informacion Mirto Laclé, 7426274.
