Empoderando lidernan di bario pa medio di serie di training ‘Community Leadership’

Den colaboracion cu Amalurra Consultancy, bou di liderazgo di Nicole Hart, BARiO UNICO un programa di CEDE ARUBA, a lanza un serie di training cu ta yama Community Leadership.
E nomber ta bisa tur cos, e programa aki ta diseña pa lidernan di programa den Centro di Bario pa duna nan e herramientanan y conocemento necesario pa lidera nan Centro di Bario y e comunidad unda e Centro di Bario ta ubica. E sessionan di training a concentra riba strategiannan pa fortalece e laso social den bario y desaroya proyectonan cu un impacto positivo pa comunidad.
E iniciativa aki a culmina cu un evento dinamico den forma di café concepto cu a tuma lugar na Cas di Cultura, caminda lidernan di e Centro di Bario a presenta nan proyectonan inovativo na miembronan di sector priva. E proyecto aki a finalisa cu cinco proyecto pa diferente bario na Aruba cu e meta pa logra un impacto colectivo.

“Nos meta ta crea un espacio caminda bon idea por topa cu gran oportunidad,” un representante di BARiO UNICO a bisa. “Nos ta hopi satisfecho cu e entusiasmo y creatividad di nos lidernan di programa ora nan a conta nan visionnan cu posibel colaboradornan.”
BARiO UNICO y CEDE ARUBA ta extende nan gratitud na ATA, Gamma IT Solutions, FLEXO Manpower Services Aruba y JADS Dive Center pa nan contribucion valioso cu a haci esaki posibel. E exito di e iniciativa aki ta danki na e presencia di e organisacionnan aki pero tambe nan sosten pa e proyectonan inovativo den barionan di Aruba.
E movecion di construi comunidadnan fuerte y prospero ta depende di esfuerzonan di individuonan y organisacionnan. BARiO UNICO ta encurasha pa uni pa e causa aki dor di contribui na proyectonan cu meta pa revitaliza Centronan di Bario.
Pa mas informacion of pa siña con por contribui of apoya e iniciativa aki, por fabor tuma contacto cu BARiO UNICO – CEDE ARUBA via [email protected] of yama nos na 5827666. Hunto nos por crea un futuro mas bunita pa nos barionan.