Empleado di luna augustus na HOH ta Saskia Ramharakh

Colega Saskia Ramharakh tabatin un supuesto reunion y na momento cu ela drenta sala di reunion ela topa cu ful un otro tipo di reunion. Pues, e no a sospecha nada y a keda masha sorprendi di wak tanto colega, famia y Hunta di Directiva wardando su yegada. Miembro di Hunta di Directiva sr. Gregory Croeze a conta Saskia di biaha cu ta su team di pre-analyse di LABHOH ta tras di esaki y cu nan ta masha contento di tin Saskia como colega y nan teamleider. A nomina Saskia pa bira empleado di luna y Hunta di Directiva di biaha a bay di acuerdo cu esaki y ela bira HOH su empleado di luna di augustus 2024.

Saskia ta un colega professional cu ya tin 22 aña trahando riba tereno di laboratorio medico. Su experiencia y conocemento riba tereno di laboratorio medico ta sumamente halto y esaki ta yud’e hopi den practica ora di colabora cu otro departamentonan. Saskia ta un persona integro y dedica na su trabou locual coleganan y management ta aprecia hopi. E ta haci su maximo esfuerso pa tur colega di su departamento sinti nan mes balora. Saskia ta comunica hopi cla y asina ta aporta na un cultura di confiansa. E ta duna feedback constructivo, aunke e por ta poco duro tin biaha, esaki ta yuda na e crecemento y desaroyo di su team. Manera su team mes ta bisa: “Saskia makes things happen!”

Calidad semper ta na prome luga. Pa loke ta e protocolnan di siguridad, Saskia tin esaki hopi na pecho y ta monitor esaki continuamente. Alabes, Saskia tin wowo pa detaye y tur esaki tambe a wordo reconoci pa e Hunta di Acreditacion durante nan audit na LABHOH. No por keda sin menciona cu Saskia ta un teamplayer cu lo yuda unda cu e por y tambe elo yuda sin duda na otro departamento.

Su compromiso cu su trabou ta sublime y claramente esaki a wordo demostra y pues e merece e bunita reconocemento aki. Hunta di Directiva, management y coleganan ta bisa Saskia danki pa su tremendo trabou pa LABHOH y su coleganan y pashent, y ta spera cu e keda hopi mas aña cu nos. Pabien Saskia cu e bunita titulo aki di empleado di luna di augustus 2024!