Dilania Matos ta Hospital su empleado di aña 2024

Na comienso di januari, tur empleado di Horacio Oduber Hospital (HOH) tabatin e oportunidad pa vota pa nan empleado di luna cu a sali durante 2024 cu segun nan, merece e tremendo reconocemento di empleado di aña 2024.
Durante e bunita ceremonia oficial na e fiesta anual di HOH, Hunta di Directiva, manera ta custumber, a haci e conteo di 5 bay abou y manera cu a yega 1 hunto riba e pantaya y cu e pantaya a anuncia orguyosamente cu HOH su empleado di aña 2024 a resulta den persona di colega Dilania Matos!

Dilania tabata empleado di e luna di juli 2024 na HOH y ta traha na departamento di Hoteldienst unda cu e ta encarga cu e trbou importatante di limpiesa riba sala di operacion. Un colega hopi dedica, profesional y cu cariño y detaye pa su trabou. Dilania ta un colega cu semper ta yega trabou feliz. E tin hopi amor pa su trabou y ta gusta loke e ta haci. E ta sumamente flexibel, colegial y ta responde lihe riba trabounan cu tin cu wordo ehecuta. E ta dedica na duna servicio di calidad y ta yega semper prome cu tempo pa percura cu e sala di operacion ta completamente limpi y cla pa wordo uza. Dilania sigur a demostra di ta un colega ehemplar cu ta cumpli cu e lema, norma y balornan y ta bay ‘the extra mile’ pa yuda otro colega.

E reconocemento impresionante aki sigur lo ta uno inolvidabel pa Dilania y su carera! Hopi danki na tur colega cu a vota y alabes contribui na haci e celebracion aki uno cu sigur e no lo lubida! Un anochi fabuloso unda cu tur colega a disfruta, pasa tempo hunto y gosa un rato pafo di trabou den un ambiente diferente yena di sorpresa.

Masha masha pabien Dilania!