Diahuebs Prome Minister a reuni cu Premier di Hulanda Dick Schoof 

1

MOTIBO PRINCIPAL DI E REUNION TAWATA RIBA E MANEHO FINANCIERO RESPONSABEL DI GOBIERNO DI ARUBA   

ORANJESTAD – Prome Minister Evelyn Wever -Croes na e momento aki ta na Hulanda riba un biahe di trabou pa atende varios reunion importante. Diahuebs 6 di februari, e Prome Minister di Aruba a reuni y na e mesun momento cera conoci cu Minister President di Hulanda, señor Dick Schoof. 

Durante e reunion a trata diferente punto di interes, pero e prome punto cu e Premier Hulandes tawatin riba su agenda a trata e maneho financiero responsabel di pais Aruba. Riba esaki Prome Minister di Aruba a duna e mandatario Hulandes un relato detaya di tur e trabounan cu a haci y ta haciendo pa Aruba ta financieramente stabiel na e momento aki.

Prome Minister a indica cu e ta compronde cu e premier Hulandes a pone prioridad na e maneho financiero di Aruba, pa motibo cu den pasado e situacion di Aruba tawata diferente.

Tambe e mandatario di Aruba a subraya e echo cu tin un nerviosismo na Hulanda na e momento aki pa loke ta trata e cambio di gobernacion na Aruba. Riba esaki, e por a mantene e trankilidad bou e mandatario Hulandes, indicando unda Aruba ta para na e momentonan aki. 

Aparte di e aspecto financiero, durante e reunion, tambe a papia di e relacion den Reino y riba temanan cu ta wordo trata cu Secretario di Estado y di e siguridad di Aruba den e region.. Hulanda ta organisando e cumbre di NATO na mei 2025 y na caminda pa esey tin varios aspecto cu por afecta Aruba. Manera e tema di Venezuela, e tema di siguridad den nos region cu ta puntonan importante, pero tambe e decisionnan cu ta wordo tuma na Merca y e efectonan cu nan por tin pa Aruba. 

Prome Minister a indica cu a trata di un bon reunion y den e dianan venidero e lo elabora mas den detaye riba e diferente puntonan cu a trata durante e reunion aki.