42
Dia 22 di februari Het Arubaanse Padvindsters Gilde a celebra e di 100 aniversario di “ Dia Mundial di Pensamento” cu tur miembro activo.
Tema e aña aki ta: Amistad.
Nos a reuni pa celebra Amistad, union, liderazgo, hermandad como parti di nos movemento mundial di Guia/Padvinderij.
Dia di Pensamento/Denkdag/ Thinking day ta cay riba 22 di februari, fecha di nacemento di sr. Lord Robert Baden-Powell cu ta fundador di Scouting y su sra. Lady Olave Baden-Powell.
E dia a cuminsa contando e historia di e fundadornan di Scouting y motibo pa celebra e dia special aki. Pa haci e storia mas “bibo”, nos rumannan scout di Grupo San Dominico Noord, Akela Sharlyn Farro y Hopman Rodolfo Angela a impersona señor y señora Baden-Powell.
E gruponan a wordo parti den seccion Beyisima cu a decora un popchi cu ta representa un “ruman scout” di e 5 World Centernan. Nan a siña e idioma di Amistad y decora un curason pa na final, traha un poster di “Arco Iris di Amistad”.
E kabouternan a canta, a haya un nota cu mensahe y mester haci’e cu e grupo, a decora e dashi y a traha armband di Amistad.
E Padvindsternan a marcha bay Clubhuis na Savaneta. Despues a graba un video di e mucha muhernan cu a join padvinderij prome biaha y e pv’nan mester a comparti nan experiencia. Na final scavenger hunt.
APG ta un organisacion nacional di Guia/Padvinderij pa e ser femenino.
A wordo funda na 1941, e aña nos ta cumpli 85 aña di existencia.
Na 1993 a bira miembro asocia di e organisacion mundial di “World Association of Girl Guides and Girl Scouts (WAGGGS)”, y na 2017 a bira miembro completo.
Actualmente tin 5 grupo activo, Theresia Groep na San Nicolas, Jeanne d’Arc Groep na Savaneta, Grupo Maria Auxiliadora na Santa Cruz, Beatrix Groep na Dakota y Imelda Groep na Noord.
Seccion beyisima ta edad 4-7, Kabouter ta 7-11, Padvindster 11-17, jong lider 17-21 y lider +21.
Tur siman e programanan ta yena cu actividad pa cada mucha desaroya nan mes. Disciplina, siña traha y comparti cu otro, fomenta balor, compromiso, convivencia y respet pa otro.
Muchanan ta siña entre otro campa, hike, haci actividadnan sano.
Nos lidernan ta traha voluntariamente pa sigui empodera nos hobennan pa sigui riba e caminda corecto y contribui activamente na nan formacion.
Cera Amistad nobo, pero mantene esnan existente.
Un ta plata, e otro ta oro.
E circulo ta rondo, e no tin fin.
Asina largo, ami kier ta bo amiga!
Directiva ta gradici tur mayor, miembro y lidernan cu a yuda organisa y atende e actividad.
Hunto nos ta aporta na un mundo miho.
