Departamento di Relacionnan Exterior ta uni su mes na e lema mundial “Give to Gain” den cuadro di Dia Internacional di Hende Muhe

4

Den cuadro di Dia Internacional di Hende Muhe, Departamento di Relacionnan Exterior (DBB) ta uni su mes na e lema mundial “Give to Gain”. E mensahe ta poderoso: ora nos inverti den e capacidad di hende muhe y mucha muhe, nos ta activa un reaccion den cadena cu ta fortalece nos economia, nos famianan y nos ta eleva nos sociedad completo.

Pa DBB, e dia aki ta un compromiso bibo pa habri caminda pa e futuro generacionnan. Nos vision ta un Aruba unda hende muhe y mucha muhe ta gosa di e libertad pa scoge nan rumbo cu seguridad, e espacio pa destaca den tur nivel profesional, y un asiento na mesa unda nan bos ta resona den cada decision crucial.
Den e mundo di diplomacia, nos ta aplica e filosofia di “Give to Gain” tur dia. E no ta solamente un intercambio di man den reunionnan oficial, sino e herment principal pa construi e brugnan cu nos muhenan mester pa yega nan meta:

Conexion Global: Pa medio di nos relacionnan internacional, Aruba ta keda conecta cu e standardnan di mas halto di United Nations pa proteha derechonan humano cu un atencion especifico riba e derechonan di hende muhe.
Empoderamento pa medio di cooperacion: Pa medio di nos asociacionnan internacional, nos ta facilita e intercambio di conocemento y experencia den areanan clave manera ciencia, politica, sostenibilidad y economia. Nos ta traha pa habri porta na proyectonan y plataformanan cu ta sirbi como un catalisador, treciendo programanan di desaroyo y mihor practicanan pa fortalece e posicion di nos hende muhe y mucha muhenan riba e escenario mundial
E bos den exterior: Como e bos di nos isla den exterior, DBB ta reafirma cu Aruba ta un pais moderno cu ta balora e talento y ta reconoce e derecho di hende muhe y mucha muhe riba tur nivel.

E simbolo di e aña aki, dos man habri, ta recorda nos cu duna ta nifica multiplica. Nos ta invita tur sector: gobierno, comercio y comunidad pa bira mentor, ofrece oportunidadnan di liderazgo y inverti den educacion di nos hende muhenan.
Loke nos ta planta awe, ta e cosecha di mayan. Departamento di Relacionnan Exterior ta felicita tur hende muhe riba nan dia y ta reafirma su compromiso pa sigui traha pa un mundo unda cada hende muhe y mucha muhe tin e libertad pa briya.