Departamento di Cultura Aruba, conhuntamente cu Popcorn Club Aruba y Fundacion Tur ta Posibel, ta invita pueblo en general pa bin presencia e final di e Proyecto Dream, Dare, Do & Gang di Arte 2024.
Despues di un siman di diferente tayernan riba diferente disciplina manera e.o. Baile, Teatro, Musica, Arte Visual, Audio Visual y Arte di Palabra cu a wordo duna pa instructornan local y internacional. Durante di e tayernan, e hobennan ta siña descubri nan talento scondi y asina ta cuminsa desaroya esaki, pa medio di traha un obra propio, creativo y orginal. E presentacion y creacion mester carga e tema central cu pa aña 2024 ta “UNION”. E tayernan a wordo brinda pa Dream, Dare, Do, un Proyecto den cooperacion cu Gang di Arte Aruba di Departamento di Cultura.
E final di Competencia Hubenil Gang di Arte Aruba, lo tuma luga diabierna 19 di juli 2023, na Cas di Cultura, iniciando pa 6:00pm te cu 9:00pm. E entrada lo ta completamente gratis pa tur hende.
Un total di 13 grupo lo ta participando den e competencia den diferente disciplina artistico. Di parti Popcortn Club Aruba y Departamento di Cultura kier gradici tur participante y ta deseanan hopi exito durante e presentacion final di e obra cu nan a crea.
Durante di e anochi aki, tambe lo conta cu presencia di invitadonan di Gang di Arte Bonaire cu a bini Aruba pa a forma parti di e grandioso intercambio artistico hubenil aki.
Ganadonan di e edicion Gang di Arte 2024, lo tin e oportunidad di ta e cara hubenil cu lo sigui profila nan talento durante henter aña den diferente actividad nacional como internacional. Por ultimo un bes mas un invitacion general na un y tur, specialmente na famia y conocirnan di participantenan di e Proyecto Dream, Dare, Do & Gang di Arte 2024.
Follow the story