CUERPO POLICIAL TA CONVIVI CU NOS COMUNIDAD CU E SITUACION LAMENTABEL

2

Altocomisario di Polis sr.Ramon Arnhem ta reaciona riba e incidente di tiramento na unda un hoben a perde su bida.

Diadomingo mainta despues di 5’or un incidente di tiramento hopi lamentabel a tuma lugar, na unda durante un persecucion un hoben di 19 aña a perde su bida.

Na prome lugar nos pensamento ta bay na e famia di e victima. Nos ta lamenta profundamente for di nos curason y ta deseanan hopi forsa den e momentonan dificil aki.

Na mes momento nos ta convivi cu nos coleganan cu ta envolucra den e incidente y awo lo mester deal cu e consecuencianan. Ta importante pa enfatisa cu niun di nos polisnan ta bay traha y sali patruya cu e intencion di uza nan arma reglamentario.

Mi ta compronde tur e emocionnan y indiganacion cu tin ariba medianan social cu ta wordo comparti di e incidente. Di berdad, ta crucial pa warda riba e investigacion di
Landsrecherche keda cla prome cu nos por saca nos conclusion of speculacion.

Landsrecherche ta un instancia independiente cu ta percura pa e investigacion cana su caminda manera mester ta.

Nos tin pleno confiansa den nan profesionalismo y nan experticio y lo warda e resultado di e investigacion.

Nos kier enfatisa cu provoca violencia of rumornan di culpabilidad sin base basa riba speculacion ta inadmisibel. Nos ta monitoriando tur plataforma socialnan y lo actua contra di tur esakinan

Na final nos kier a señala cu tin speculacion bayendo rond di coleganan cu na niun momento ta envolucra den e caso encuestion. E ta inhustamente y dañino pa cu nan. Nos ta pidi na tur hende pa no share informacion cu no ta veridico.

Mi ta mas cu sigur cu e investigacion di Landsrecherche lo trece claridad kiko exactamente a tuma lugar. A base di e resultado si ta necesario nos lo tuma e medidanan necesario.

Un biaha mas nos pensamento ta cu e famia di e victima y nos coleganan di e incidente tragico aki.