Criatura ta scapa, despues cu su mama burachi na stuur a bolter e auto – Aruba Native

Spaans Lagoen – Diahuebs anochi algo pasa di 8’or a sosode un accidente poco pariba di Mangel Halto. Un Nissan March a bolter y keda memey di caminda.

Polis y ambulance a sali cu urgencia pa Spaan Lagoen, unda a sosode un accidente serio cu hende herida.

Habitantenan mesora a bati alarma debi e impacto fuerte unda un March cu un mama na stuur y su yiu chikito a dal contra un auto staciona y despues bolter.

E dama visiblemente bou influencia. Polisnan di trafico a yega y mesora a lage supla unda cu a sali cu e la bebe.

Paramediconan cu a yega e sitio a bay mesora unda e criatura tur spanta tawata. Aki ta unda e mama a altera masha mahos contra e Paramediconan.

E la wordo deteni y poni den auto di polis pendiente e transportwagen.
Tata di e criatura a presenta pa bay cu e mucha y tawata tin un intercambio no bunita di palabra.

Un yiu muhe a presenta y a puntra polis pa e papia cu su mama, despues hunto cu mas famia a piki e pertenencianan cu tawata den e March. E auto mes no ta sirbi mas.

Na final transportwagen a presenta y a hibe warda di polis.
Posiblemente problemanan personal ta hiba hende na extremonan asina y ta lubida cu tin un bida inocente den e auto.

Nos ta desea tur cos bon pa e dama.