CBCS ku aplikashon inovativo pa detekshon trempan di riesgo
CBCS ku aplikashon inovativo pa detekshon trempan di riesgo
WILLEMSTAD/PHILIPSBURG – Centrale Bank van Curaçao en Sint Maarten (CBCS) ta
modernisá su sistemanan i medionan teknológiko pa monitoriá riesgo. Di e manera aki, CBCS
ta keda al dia ku desaroyonan mundial pa por detektá, mas trempan posibel, riesgonan ku nos
sistema finansiero ta enfrentá.
CBCS su sistema di monitoreo i alerta rápido (na ingles: EWMS) ta un hèrmènt prinsipal pa analisá
riesgo pa stabilidat finansiero. Detektándo riesgo for di trempan ta permití CBCS tuma medida di
maneho na tempu.
Fuera di e indikadónan konvenshonal di alerta rápido, CBCS ta usa vários
téknika di pronóstiko pa komprondé kon balans di e institutonan finansiero por kambia ora apliká
sierto shòk. Tambe, CBCS ta desaroyando un aplikashon pa investigá merkado di bibienda. Usando
téknikanan avansá di análisis di dato, ta optené informashon tokante e faktornan ku ta afektá preis
di bibienda. E resultadonan lo yuda CBCS vigilá pa riesgonan relashoná ku desaroyo riba merkado
di bibienda.
Na 2023 CBCS a diseñá un aplikashon pa evaluá riesgo di krédito den kolaborashon ku Caribbean
Regional Technical Assistance Center.
E abilidat di pronostiká riesgo di krédito ta permití CBCS usa
modelo finansiero pa mira ki efekto shòk makroekonómiko por tin riba kalidat di e aktivonan ku e
bankonan tin.
Na su turno, esei ta permití CBCS implementá e medidanan di maneho nesesario na
tempu. Tambe, aña pasá, huntu ku e entidatnan ku ta supervisá AML/CFT na nivel nashonal, CBCS
a partisipá na un trayekto di asistensia tékniko ku IMF, pa desaroyá un aplikashon pa monitoriá
transakshon finansiero ku ta krusa frontera (cross-border transactions).
Ku e aplikashon akí, e entidatnan ku ta supervisá AML/CFT lo ta den un mihó posishon pa monitoreá transakshon
transfronteriso den kuadro di labamentu di plaka i uso ilísito di e sistema finansiero.
Por lesa mas tokante nos EWMS den e Informe di Stabilidat Finansiero (FSR) di 2024.
E informe ta kontené un análisis di e riesgo- i vulnerabilidatnan ku a afektá sektor finansiero di nos union
monetario den transkurso di e aña anterior. E ta ofresé un perspektiva fundamentá, pa kada sektor
finansiero, ku atenshon spesial pa instrumento- i medidanan pa protegé stabilidat di nos sistema
finansiero. E resultadonan den e FSR a ser refiná ku aporte di e stakeholdernan di sektor finansiero
na Kòrsou i Sint Maarten.
E FSR di 2024 ta disponibel riba wèpsait di CBCS na:
https://www.centralbank.cw/publications/financial-stability-reports/2024.
